Europako Erreferentzia Markoa - HABE

2 0 2
Lehen motakoak oso egokiak dira irakasleak edo norberak benetako bizitzako atazei buruzko ebaluazioa
egiteko. Bi era horietako ebaluazioak egiteko oinarria ikasleak ikastaroan garatu duen hizkuntz
gaitasunaren adierazpen xehe-xehea da. Interesgarriak dira, ekintzara bideratutako ikuspegiari heltzen
lagun baitiezaieke ikasleei nahiz irakasleei.
Nolanahi ere, ez da komeni izaten aztertzaileak ahozko edo idatzizko proba jakin batean egiten den
saioa neurtzeko erabiltzen dituen irizpideen artean komunikazio-jardueren deskribatzaileak sartzerik,
baldin eta emaitzak ikasleak iritsi duen hizkuntz gaitasunaren-maila adieraztea nahi bada. Izan ere, hizkuntz
gaitasunaren berri emateko, ebaluazioak ez luke saioa hartu behar kontuan; saio horretan erakusten
diren eta saio horretatik orokor litezkeen gaitasunak neurtu beharko lirateke. Jakina, hezkuntzari
loturiko arrazoi sendoak egon daitezke saio jakin bat arrakastaz gauzatzea oinarri hartzeko, bereziki
oinarrizko erabiltzaile gazteei dagokienez (A1 eta A2 mailetakoei dagokienez). Emaitza horiek
orokortzen zailagoak izango dira, baina emaitzak orokortzeko modukoak izatea ez da izaten hizkuntzaren
ikaskuntzaren lehen etapetan garrantzi handiko auzia.
Horrek erakusten du neurketak askotariko zeregina izan dezakeela; litekeena da helburu baterako
egoki dena beste helburu baterako egoki ez izatea.
9.2.2.1 Komunikazio-jardueren deskribatzaileak
Komunikazio-jardueren deskribatzaileak (4. kapitulua) hiru eratara erabil daitezke, lortu behar diren
helburuen arabera.
1. Atazen sorkuntza. 9.2.1. sailean ikusi denez, komunikazio-jardueren eskalek ebaluaziorako
probak diseinatzeko zehaztapenak definitzen laguntzen dute.
2. Emaitzen txostena. Komunikazio-jardueren eskalak baliagarri izan daitezke, orobat, emaitzen
berri emateko. Hezkuntza-sistemaren emaitzak ezagutzeko interesa dutenek, enpresaburuek esaterako,
emaitza orokorrei begiratzen diete, gaitasunaren profil zehatz bati baino gehiago.
3. Ikaslearen autoebaluazioa edo irakasleak egindako ebaluazioa. Azkenik, komunikazio-jardueren
deskribatzaileak baliagarri dira, bai ikasleak berak autoebaluazioa egiteko, bai irakasleak
ebaluazioa egiteko, hainbat eratara, ondoren zehazten diren moduetan esaterako:
• Kontrol-zerrenda: ebaluazio jarraiturako edo ikasturte amaieran laburpen-ebaluazioa egiteko.
Maila jakin baten deskribatzaileak zerrenda batean bil daitezke. Bestela, deskribatzaileen
edukia “zatikatu” ere egin daiteke. Adibidez, Informazio pertsonala ematen eta eska -
tzen du deskribatzailea zenbait osagai esplizitutan zatika daiteke, esaterako: Badakit neure
burua aurkezten; non bizi naizen esaten dut; nire helbidea frantsesez esaten dut; nire adina
esaten badakit, etab. eta norbaiti nola izena duen galdetzen diot; norbaiti non bizi den gal -
detzen diot; norbaiti zenbat urte dituen galdetzen diot, etab.
• Zerrenda: ebaluazio jarraituan edo sumatiboan erabil daiteke. Profil bat eratzen da maila
desberdinetarako (B1+, B2, B2+) definituta dauden kategoria hautatuez osatutako zerrenda
batean (adibidez: elkarrizketa; eztabaida; informazio-trukea).
Azken hamar urteotan, gero eta gehiago erabiltzen ari dira deskribatzaileak horrela. Esperientziak
erakutsi du irakasleek eta ikasleek deskribatzaileak interpretatzeko duten gaitasuna areagotu egiten
dela, baldin eta deskribatzaile horiek ikasleak EGITEN DAKIENA ez ezik, dakien hori ONGI EDO
GAIZKI EGITEN duen deskribatzen badute.
9.2.2.2 Hizkuntz gaitasun jakin batzuen alderdiei buruzko deskribatzaileak
Hizkuntz gaitasunaren alderdien deskribatzaileak bi eratara erabil daitezke, helburuei dagokienez.