Europako Erreferentzia Markoa - HABE

Lau orientazio horiek marko bateraturako egokiak izan daitezke.
Beste ikuspegi batetik begiratuta, hau esan daiteke orientazioei buruz:
• erabiltzailearengan oinarritutako eskala bat ebaluazioaren diseinatzailearengan oinarritutako
eskala baten beste bertsio bat dela, helburua xehetasun gutxiagokoa eta osotasunezko ikuspegia
ematea duena.
• aztertzailearengan oinarritutako eskala bat diagnosian oinarrituriko eskala baten beste bertsio
bat dela, xedea xehetasun gutxiagokoa eta aztertzaileari osotasunezko ikuspegia izaten laguntzea
duena.
6 1
Erabiltzailearengan oinarritutako eskala batzuetan zehaztasuna murrizteko prozesu hori eskalaren
ondorio logikoen ikuspegi orokorra emateko bidea da, eta eskala “orokor” bat osatzen dute, maila
bakoitzeko lorpen nagusien deskribapenarekin. Beste kasu batzuetan, berriz, xehetasunak emateko
ordez egiten da hori (adibidez, lehen aipatu den finlandiar eskalan). Kasu batzuetan trebetasun jakinetarako
ematen den zenbaki-sailaren esanahia azaltzeko egiten da (adibidez, IELTS, International
English Language Testing System). Beste kasu batzuetan, sistema xeheago baten ikuspegi orokorra
emateko abiapuntua da (adibidez, Eurocentres). Kasu guztietan, hipertestuak ordenagailuz agertzeko
erabiltzen denaren antzeko ikuspegiari jarraitzen zaio. Erabiltzaileari piramide modura antolatutako
informazioa ematen zaio, eta ikuspegi orokorra, ikuspegi argia, izan dezake hierarkiaren goiko geruza
kontuan hartuta (hemen, eskala “orokorra”). Zenbat eta beherago egin sisteman, orduan eta xehetasun
gehiago eskuratuko ditu, baina pantaila edo orrialde batean edo bitan ikusiko du dena. Horrela, erabiltzailea
xehetasunekin itsutu gabe, edo azalpen hutsaletan gelditu gabe, azalduko da konplexutasuna.
Xehetasunak ere han izango ditu, haien beharra izanez gero.
Hipertestua deskribapen-sistema bat bururatzeko analogia baliagarria da. Ikuspegi horri jarraitzen
dio ESUk (English-speaking Union), ingelesa atzerriko hizkuntzatzat harturik ingelesezko azterketa
egiteko Erreferentzia Markoaren eskala osatzeko. Ikuspegi horri jarraitzen diote, era berean, 4. eta 5.
kapituluek. Adibidez, komunikazio-jarduerei dagokienez, Elkarreragina eskala-kategoria horretako
azpieskalen bilduma da.
Erreferentzia Markoaren erabiltzaileek gogoan izan beharko dute, eta, hala dagokionean,
zehaztu:
• mailetan duten interesak zenbaterainoko lotura duen ikaskuntzaren helburuekin, programarekin,
jarraibide ofizialekin eta kontrol jarraituarekin (ebaluazioaren diseinatzailearengan
oinarritutakoa);
• mailetan duten interesak zenbaterainoko lotura duen ebaluazioan sendotasun gero eta
gehiago lortzearekin, trebetasun-mailari buruzko irizpide zehaztuak emanez (aztertzailearengan
oinarritutakoa);
• mailetan duten interesak zenbaterainoko lotura duen langileei, hezkuntzako beste sektoreei,
gurasoei eta ikasleei berei emaitzak adieraztearekin (erabiltzailearengan oinarritutakoa).
3.9 Hizkuntz gaitasunak eta emaitzak
Mailaketari buruz jarduteko, garbi bereizi behar dira gaitasun mailen (adibidez erreferentzia maila bateratuen)
definizioaren eta maila jakin bateko helburu bati buruzko lorpen-mailaren ebaluazioaren artean.
Hizkuntz gaitasunaren eskalak, erreferentzia maila bateratuek adibidez, gaitasunen hurrenez
hurreneko zerrenda batzuk definitzen ditu. Ikaslearen gaitasunaren esparru kontzeptuala bere oso-