Download - islamic education panel

Sura ya Sita
MIPANGO KATIKA HARAKATI ZA KIISLAMU
Maana ya Mipango (Planning)
Tunaweza kusema mipango ni utaratibu wa kuendea lengo
husika kwa ufanisi kwa kufuata hatua baada ya hatua. Kuweka
mipango ni kutengeneza njia ya kumfikisha mtu mahali
anapokusudia kwenda kwa wepesi. Ukiwa njiani kuelekea
uendako, waweza kupotea njia na kuelekea usikokusudia au
waweza kufika mahali ukadhani umefika kumbe bado kutokana na
kutokuwa na mpango wa safari.
Umuhimu wa kuweka mipango
Wataalamu wa fani ya mipango wana msemo “Ikiwa
unashindwa kupanga, basi unapanga kushindwa”. maana yake ni
kwamba ukishindwa kuweka mipango ya jambo lolote
unalokusudia kulifanya, umeamua kushindwa kufanya jambo hilo.
Hekima ya msemo huu ni kuwa, iwapo utafanya mambo bila ya
kuweka mipango madhubuti, waweza kupoteza nguvu bure bila ya
kupata matunda tarajiwa. Lakini endapo utapanga mipango yako
vyema kabla ya kujitosa katika utekelezaji, kwanza utabakia katika
lengo na pili hutafuja juhudi na nguvu zako katika mambo ambayo
hayako katika mpango wako.
Kwa muhutasari tunaona kuwa kuweka mipango katika
kufanya mambo yetu ni muhimu kwa sababu zifuatazo:
Kwanza, kuweka mipango hutufanya tuwe makini katika
kuweka malengo. Kwa kuwa na mipango tutahakikisha kuwa
tunaweka malengo yanayotekelezeka. Lengo lolote tunaloliweka ni
lazima tuliweke kwenye mizani ya kiutekelezaji na tukiona
halitekelezeki tunaliacha.
169