Hobbitus Ille The Latin Hobbit - Latin for everyone!

subito Bilbo rem intellexit. omnium periculorum
oblitus, in proiecto saxi stetit et, clamantes atque bracchia
iactantes, nanos salutauit. alii, qui proximi fuerunt, quam
citius potuerunt super saxa cadentes et secundum
proiectum saxi ad eum uenerunt, mirantes quid in orbe
terrarum ageretur; ceteri clamauerunt ut a funibus
tollerentur (Bombure excepto, sane: ille dormiebat).
cito Bilbo rem explanauit. omnes silescebant: hobbitus
iuxta saxum glaucum stabat, et nani barbis quassantibus
impatientes intuebantur. sol inferius inferiusque cadit, et
spes sua deciderunt. illa in cingulum nubium rubicundarum
cadit et euanuit. nani gemuerunt, sed Bilbo paene
immobilis adhuc stetit. luna parua ad orbis finientem
mergebatur. uesper appropinquabat. tum repente, spe
omnino demissa, radius quidam ruber solis sicut digitus
per scissuram in nubibus effugit. fulgor lucis a recta uia
per ingressum in sinum uenit et in faciem planam saxi
cecidit. senex turdus, qui a pertica alta cum oculis
scrutantibus et capite ad latus unum uerso intuitus erat,
repente uibrauit. fuit magnus crepitus. assula quaedam saxi
a muro fissa decidit. repente foramen circa tres pedes a
terra apparuit.
cito, horrentes ne casus hebesceret, nani ad saxum
properauerunt et id pepulerunt – frustra.
“illa clauis! illa clauis!” Bilbo uociferatus est.“ubi est
Thorinus?”
Thorinus festinanter uenit.