Hobbitus Ille The Latin Hobbit - Latin for everyone!

nunc tamen captiui de ipsis solum cogitabant. gobelini eos,
manibus catenatis post terga eorum, in linea iugauerunt, et
ad extremum cauernae, Bilbone paruulo in fine ordinis
nitenti, traxerunt.
ibi in umbris in magno saxo plano gobelinus tremendus
capite ingenti sedebat, cinctus a gobelinis armatis, qui
secures atque enses flexos ferebant, quibus uti solebant.
gobelini autem sunt crudeles, malefici, atque cordibus
malis. res pulchras fecerunt nullas, sed multas callidas.
cuniculos et fodinas fodere tam bene quam aliqui nani
praeter callidissimos possunt, cum illa facere curant,
quamquam sordida immundaque esse solent. malleos,
secures, enses, pugiones, dolabras, forcipes, instrumenta
quoque tormenti optime fecerunt uel alteros cogunt qui illa
fecerint, captiuos atque seruos quibus laborandum est
donec aere luceque carentes moriuntur. ueri simile est eos
repperisse nonnullas machinas, quae ex quo tempore
orbem terrarum uexauerunt, praecipue artificia callida ad
multos homines simul interficiendos, nam in rotis et
machinis et crepitibus gauisi sunt, et etiam laborare
manibus suis magis quam uoluerint non sibi placet; sed
illis in diebus et regionibus uastis non tantos processus
(ita id dictum est) effecerant. nanos non praesertim
oderunt, non magis quam omnes omniaque, praecipue
modestos et prosperos, oderunt; in aliquibus regionibus
nani mali etiam cum illis societatem fecerant. qui autem,
propter bellum, de quo mentionem audiuisti sed quod non