Hobbitus Ille The Latin Hobbit - Latin for everyone!

Thorine, a runis Orcristus appellatur, Scissor-gobelinorum
in lingua uetere Gondelinis; fuit lamina clara. hic,
Gandalphe, fuit Glamdring, Malleus-hostium, quem olim
rex Gondelinis gessit. bene eos curate!”
“unde trolla eos acquiserint miror?” Thorinus inquit
ensem curiositate noua aspiciens.
“nescio,” Elrond inquit, “sed potest existimare trolla
tua praedata esse praedatores alteros, aut reliquias
praedationum ueterum in aliquo secreto in montibus
inuenisse. audiui thesauros ab antiquis diebus adhuc
oblitos in antris desertis fodinarum Moriae inueniri posse,
ex eo tempore belli nanorum gobelinorumque.”
haec uerba Thorinus considerauit. “hunc ensem in
honorem curabo,” inquit. “mox gobelinos iterum scindat!”
“ueri simile est desiderium illum perbreui tempore in
montibus concessum iri!” Elrond inquit. “sed nunc tabulam
geographicam tuam mihi exhibe!”
quam cepit et diu aspexit, tum caput quassauit; quod si
nanos atque cupiditatem eorum auri non omnino approbat,
dracones atque maleuolentiam eorum crudelem odit, et
ruinam urbis Conuallis atque tintinnabula eius iucunda
atque ripas conflagratas Fluminis Fluentis nitidi
meminisse eum miseruit. luna in cornu lato argenteoque
lucebat. tabulam sustulit et lux candida per eam luxit.
“quid est hoc?” inquit. “hic sunt litterae-lunae, iuxta runas
simplices quae ‘quinque pedes altitudine ianua et in latum
tres ambulent’ dicunt.”