nalgures - Asociación Cultural de Estudios Históricos de Galicia

comendador templario, para destinar á curación dun servente seu, Xoán Rodríguez, que fora
golpeado en Lugo por dous serventes do abade, “demens Lupus et Johannes Sesgo”.
Por último, nun documento datado probablemente a finais do século XIII, aparece unha
longa declaración de testemuñas na disputa que sosteñen os monxes de Ferreira co comendador
e freires templarios de Sanfiz pola posesión do Vilar de Couso, que estaba no camiño de
Santiago, e un hospital erixido no lugar. As dúas institucións nomearon como homes bos ás
seguintes persoas: por parte de Ferreira de Pallares, a Fernando Pérez, presbítero de Vilamaior,
e Xoán Rodríguez, miles de Vila de Aldar; e por parte do comendador de San Fiz, a Martiño
Peláez, presbítero de “Marciam”, e Martiño Yañez, “miles” de Mondim. Declaran 56
testemuñas. A maioría di que oíran que a propiedade do lugar era de Ferreira de Pallares
(algunha testemuña di que lle fora doada ao mosteiro pola condesa Elvira). Das declaracións
entresácanse outros datos interesantes, dende a orixe da cesión desa propiedade, con algunhas
achegas xenealóxicas dos condes de Pallares, a nomes de nobres da zona ou de comendadores
templarios de San Fiz, como Munio, ou don Fernando Arie (este na época en que era
abade de Ferreira don Abril) 76 .
2.5. Dereitos eclesiásticos
Respecto dos dereitos eclesiásticos, remitímonos ao dito ao estudar a bailía de Canabal.
2.6. Membros da Orde
A Orde do Temple na provincia de Lugo
Sobre o listado de comendadores, freires e outros membros da Orde, poucos son os que
coñecemos. Posuímos referencias dos seguintes:
– 1227, abril, 6: Freires: Didacus Martini 77 .
– Entre 1222 e 1231: Comendador: Fernandum Arie 78 .
– 1241, agosto, 18: Comendador: Johannem Lupi 79 .
– Mediados do século XIII: Comendador: Petrus Eanis 80 e “comendador dompnus
Munio”.
– 1265, xaneiro, 16: Comendador: L.; Servente do comendador: Johannes Roderici 81 .
76 Rey Caiña e outro, 1984: 249-254; Martínez Díez, íbidem; Ferreira Priegue, 1988: 189. Vid. tamén Carlos Vázquez García:
O mosteiro de Ferreira de Pallares, Santiago, 2006, páxs. 68-69.
77 Rey Caiña: “Benedictinos...”, II, páxs. 243-5.
78 Rey Caiña, “Benedictinos...”, páxs. 149-254.
79 Rey Caiña: “Benedictinos...”, II, páxs. 246-247.
80 Ferreira Priegue chámalle ao comendador Fernán Eanes (sic).
81 Rey Caiña: “Benedictinos...”, II, páxs. 247-249.
NALGURES • TOMO II • AÑO 2005 255