udhezues letersia 11

Udhëzues për tekstin “Gjuha shqipe dhe Letërsia 11”
4- Në grupin e paraqitësve të fakteve nxënësit do të ushtrohen të dinë të dallojnë dhe
të paraqesin faktet brenda një artikulli gazete dhe të ushtrohen në përcaktimin e tyre.
Pasi të kenë vëzhguar me vëmendje mënyrën e paraqitjes së fakteve në tekstin e librit,
ata duhet të ushtrohen në mënyrë praktike për përcaktimin e tyre brenda artikullit.
• Kush (një grup arkeologësh kinezë)
• Çfarë (kanë gjetur arkën e Noes…)
• Ku (në majën 4 mijë metra të malit…)
• Kur (ditën e mërkurë, më datë 23, ora 20.00)
• Pse (pas testimit me karbon është vërtetuar se...)
Njëkohësisht duhet të kenë parasysh që për realizimin më të saktë të përcaktimit të
fakteve ata veprojnë në këtë mënyrë:
• vënë në dukje fjalët dhe fjalitë kyç të materialit të dokumentuar;
• ndërtojnë një listë me fjalët kyç;
• bëjnë një sintezë të shkurtër të materialit etj.
5- Në grupin e paraqitjes së opinioneve nxënësit do të përpiqen të ndajnë opinionin
nga fakti.
Duke u mbështetur në artikullin e mësipërm mund të vëmë në dukje këtë paragraf të
tekstit:
“Nuk mund të themi se kjo është 100% Barka e Noes, por 99% jemi të sigurt.(Këtu
opinioni është gërshetuar me dhënien e fakteve) Struktura antike kishte disa nënndarje
me shtylla druri, në të cilat me siguri gjendeshin kafshët…- tha Yeung Wing –Cheung,
regjisor nga Hong Kongu…”
Pas 10 minutash, gjatë së cilës nxënësit janë konsultuar në grupet e ekspertëve për
të organizuar punën e tyre, ata rikthehen në grupet bazë, ku për rreth 5 min diskutojnë
për vendimin që do të marrin për artikullin që do të shkruajë grupi i tyre.
Pasi kanë shkruar artikullin, nxënësit duhet ta rishikojnë atë si nga ana e përmbajtjes,
ashtu edhe për të bërë korrigjime të gabimeve drejtshkrimore, të kontrollojnë
përdorimin e kohëve të foljeve, lidhjen logjike të pjesëve të ndryshme të fjalive
(kohore, shkakore, kundërshtore etj.), përdorimin e shenjave të pikësimit, veçanërisht
përdorimin e presjes etj.
Në fund çdo grup bën prezantimin e llojit të artikullit që do të shkruajë duke detajuar
tregues të secilit hap.
Shënim: nëse koha për realizimin e plotë të etapës nuk është e mjaftueshme
mësuesi/ja mund t’ua japë këtë si detyrë shtëpie ku nxënësit i kërkohet të shkruajë
plotësisht artikullin e gazetës së shkollës.
71