shkarko - Syri 3

289 Skeletet udhëtojnë pa pasaporta
Skeletet udhëtojnë pa pasaporta
S’e dimë a do të qëndrojë deklarata e Dhimitër
Xhuvanit se më mirë është të thuhet diç e censuruar se të
heshtet plotësisht. Populli shqiptar, si edhe popujt të tjerë,
s’ka qenë i aftë ta bëjë një grevë pesëdhjetëvjeçare-të mos
shkruajë asnjë libër, asnjë gazetë, asnjë revistë, asnjë
pamflet. Greva, protestat, bëhen në afate të caktuara, burgjet
me vite të tëra, ndërsa greva e përgjithshme kombëtare si
protestë ndaj totalitarizmit u pa se ishte diç e pamundëshme.
“Më i varfëri është ai që kërkon shumë”- thotë Pjetër Bogdani,
i cili e kishte ndjenjën e masës. Në një fjalim të mbajtur
nëpërmjet Radio Uashingtonit, me 31 mars 1933, Faik Konica
thotë: “... Dhe mbasi fola për shkrimtarët, do t’ju them një gjë:
kam vënë re se librat e lutjeve fetare, ndërsa kanë lutje për
çdo shkollë e zanat, s’kanë ndonjë lutje të veçanta për
shkrimtarët. Unë nuk jam fetar, por nga ndonjëherë më kaplon
zjarri për ndonjë besim të shkurtër. Jam tani në një gjendje të
tillë dhe kam gatuar një lutje të shkurtër, të cilën, ju kërkoj leje
ta këndoj. S’ka të bëjë me asnjë fe të veçantë dhe njerëz të
çdo feje mund ta pranojnë: “ATI YNË QË JE NË QIELL,
JEPNA FUQINË TË MBAJMË GOJËN TË MBYLLUR KUR
S’KEMI GJË PËR TË THËNË! FALNA DURIMIN TË
THELLOJMË NJË PUNË PËRPARA SE TË SHKRUAJMË
PËR TË! FRYMËZONA ME NJË NDJENJË TË MBREHTË TË
DREJTËSISË, QË TË FLASIM JO VETËM ME PAANËSI,
POR EDHE TË SILLEMI ASHTU! SHPËTONA NGA
GRACKAT E GRAMATIKËS, NGA SHTREMBËRIMET E
GJUHËS DHE NGA LAJTHIMET E SHTYPIT. ASHTU
QOFTË!"