Diskurtso kooperatiboak langile-kolektiboan ... - Euskara

Atal teorikoa
Hirugarren aroa:1990tik aurrera
3.4 Sektoreen araberako egituratzea
Egituratze berri honek lehiakortasuna handitzea eta arrakasta
ekonomikoa ekarri zuen, baina komunikaziorako gune naturalak eta
ordura arteko elkartasun lokarriak apurtu zituela esan dezakegu:
egitura handiago eta konplexuagoak nagusitzean gertutasun eta
atxikimendu sentimenduak ere ahulduko dira pixkanaka, inplikazio
eta partehartzerako bidea zailduz.
90.hamarkada horretan inguru eta estrategia ekonomikoan egondako
aldaketetaz gain, AKEk testuinguru ideologiko eta soziologiko
ezberdin batean kokatu zela esan dezakegu beraz. AKEk berak
sortutako lanpostu eta aberastasunak eraginda, beharrizanen
kooperatiba izatetik ugaritasunaren kooperatiba izatera pasako
da, ugaritasun eta kontsumo gizartearen elementu eta faktore
bultzatzailea bihurtuz.
Era berean, MCCren politika edo ildoak jatorrizko eraldaketa
proiektutik urruntzen joango dira. Merkatuaren erritmora
egokitzeko saiakeran eta nazioarteratze eta hazkuntza
ekonomikoaren mesedeetan, gizarte erantzukizuna eta
komunitatearekiko zerbitzua alboratuko ditu pixkanaka-pixkanaka.
Enpresa kooperatibo eta kapitalistaren arteko nolabaiteko
homogenizazio prozesua martxan jarri zela esan daiteke, horren
adibide garbia kooperatibetan indarrez sartu den management
berria edo enpresa post-tayloristaren diskurtsoa dugu.
Arrasateko esperientzia lan komunitate izatetik antolaketa sare
konplexu izatera igaro da; hala ere, Kooperatiba arteko Elkarlaguntzarako
Baltzu Zentrala eta Kooperatiben arteko Hezkuntza
eta Sustapeneko Baltzuari esker zenbait gizarte ekintza
sustatzen dira: Hezkuntza kooperatiboko ekintzei, teknologia
proiektuei eta abarrei dirulaguntzak eta laguntza teknikoa eta
kooperatiben indartzea bultzatzeko dirulaguntzak besteak beste.
Beste gai hauekiko konpromezuak ere hartu izan dira azken
urteotan: langileen asebetetzea, unibertsitatearen garapena,
ingurumena, euskara planak enpresa kooperatiboetan, etab.
117