Diskurtso kooperatiboak langile-kolektiboan ... - Euskara

Atal enpirikoa
Azterketa kuantitatiboa
5.Azterketa kuantitatiboaren ondorioak
Kooperatiba eta kooperatibagintzari buruzko galdetegia SPSS
programa estatistikoarekin aztertu ondoren, atera ditugun
ondorio esanguratsuenak laburbiltzen ditugu ondorengo lerroetan.
Gogora ditzagun atal kuantitatibo honen helburuak zeintzuk
ziren: Fagor Arrasateko kolektiboak kooperatiba eta
kooperatibagintzaren gainean dituen iritziak kuantifikatzea
genuen lehen helburua. Bigarrena, kooperatibaren gaineko
iritziak alderik ote duen adinaren aldagaia kontuan izanik eta
hirugarrenez, Fagor Taldeari buruzko iritziak jaso eta
kuantifikatzea bi aldagai aintzat hartuta. Alde batetik adinaren
aldagaia eta bestetik organoetako kide izatearen aldagaia.
Bi atal nagusitan banatu ditugu ondorioak, eta azalpenarekin
batera interpretazio kritikoa egin dugu. Lehen zatian
kooperatiba eta kooperatibagintzari buruzko iritzi multzoak
kuantifikatu eta ondorioztatu ditugu. Bigarren zatian Fagor
Taldeari buruzko emaitzetatik eratorritako ondorioak aztertu
ditugu.
5.1. Kooperatibaz eta Kooperatibagintzaz
5.1.1 Kooperatibagintzak badu etorkizunik
Galdetegiaren lehen blokean izaera kooperatiboaz galdetu dugu,
kooperatibagintza eta eredu kooperatiboaren gaurkotasunaz
arduraturik kooperatibak gaur egungo enpresa munduan baliagarri
ote diren jakin nahi izan dugu. Sarri entzuten dugu
kooperatibak gaur egun jada ez direla bestelako enpresetatik
ondo bereizten, zentzua galdu ote duten da gure kezkarik
nagusiena. Horregatik lehenik eta behin eredu kooperatiboa
formula kooperatibo moduan baliagarri ote den galdetu dugu.
Gehiengoaren iritziz baliagarria da kooperatiba enpresa formula
moduan (%54a ados eta %39a erabat ados agertu dira) eta era
berean kooperatibak eta bestelako enpresak ez direla berdinak
uste dute galdetutakoen artetik gehienek (%67a eredu berdina
direla dioen baieztapenaren kontra agertu da eta erabat kontra
%24a).
Kooperatibak eta kooperatibagintzak badu etorkizunik Fagor
Arrasateko kolektiboaren iritziz. (%57a ados eta %26a erabat
ados agertu da). Halere, gehiengoarentzat kooperatibak aurrera
egin dezan arlo soziala lantzea garrantzitsua da eta era berean,
badago aukera kooperatibagintza berritu eta koherenteago batera
bidea egiteko (%62a ados eta %19a erabat ados agertu dira).
Beraz, etorkizunari begiratuz baikortasuna da nagusi.
Belaunaldiei dagozkien iritzi multzoen artean ere ez du
desberdintasun handirik topatu.
460