Diskurtso kooperatiboak langile-kolektiboan ... - Euskara

Atal enpirikoa
Emaitza orokorrak
Eraikitzaile-pragmatikoa
Hauek ez dute lehenaldia idealizatzen. Sasoi batean ere
denetarik ei zegoen. Atzera begiratu beharra dago, bai, baina ez
berau idealizatzeko, baizik eta orduko pentsamendu eta egiteko
moduetatik ikasi eta gaur egunera ekartzeko. Gaur egun
planteamendu ideologikoa falta dela uste dute. Gaur egungo
kooperatibagintza izango dena egiten asmatu beharra dago,
belaunaldi berriei erakargarri egingo zaien zerbait eraiki
beharra dago. Kooperatibagintza bidegurutzean egon arren
etorkizunari baikor begiratzen diote eta, gainera, etorkizuna
eraikitzeko prest agertzen dira, protagonista sentitzen dira.
Diskurtso honen atzean aurkitu ditugu etorkizunera begirako
argumentu propositiboenak. Kooperatibagintzaren norabidea kezkaz
bizi dute, baina kooperatibagintza eraberritzeko egin beharreko
batzuk zeintzuk diren argi dituzte. Belaunaldi berriekin
konektatu beharra dago eta horretarako formazio kooperatiboa
eskaintzea litzateke lehen urratsa. Kooperatibagintzan sakondu
beharra dago. Demokrazia kooperatiboa landu eta gaurkotu, bai
dimentsio instituzionalari nahiz lanpostuko partehartzeari
dagokionean.
Ildo beretik, barrutik kanporako kooperatibismo bat egin behar
dela diote. Kooperatiba bera eraberritu eta biziberritu beharra
dago mundu edo ingurune justuago bat eraikitzen hasteko.
Kooperatibak gizartea eraldatzeko tresna gisa ulertzen dituzte.
Etorkizunean, kooperatibagintza “asmatzen”, eraikitzen
jarraitzea gustatuko litzaieke. Mantentzeaz haratago, sakontzeaz
eta aurrera egiteaz mintzo dira. Kooperatibagintzak nondik nora
jo behar duen argien dutenak kokatzen dira diskurtso honen
atzean.
Atal teorikoan landu ditugu Azkarragak bere tesi lanean
identifikatutako kooperatibagintzaren gaineko lau diskurtsoak.
Haiek gogora ekarri eta guk landuko ditugunekin konparatzen
saiatuko gara. Azkarragak Tradizionalismoa edo jarrera
esentzialista moduan kalifikatu zuen diskurtsoaren baitan galera
sentimendua gailentzen zen. Guk Fagor Arrasaten aurkitu dugu
galera sentimendurik, bi diskurtsotan kokatu dugu elementu hori.
Etsipenaren diskurtsoan eta eraikitzailearen baitan jarrera
nostalgikoaren barruan aurkitu dugu sentimendu hori. Eta
azkenik, neurri apalago batean aurkakotasunaren diskurtsoaren
baitan ere suma daiteke galerarik.
Erlatibismoa edo jarrera postmodernoa da Azkarragak
identifikatutako beste diskurtso bat. Hauentzat, jada zaila da
zentzu oinarri komuna eraikitzea, eta maila funtzionalean
bakarrik ulertzen dute kooperatibagintzak egin dezakeen
ekarpena. Jarrera hori oso lausoki ikusi edo sumatu dugu Fagor
Arrasateko kolektiboan, baliteke etsipenaren diskurtsoan zein
491