Diskurtso kooperatiboak langile-kolektiboan ... - Euskara

Hitzaurrea
Lan hau egiteko geneukan akuilu nagusia honako hau zen: kooperatibagintzari
buruz langile kooperatibistek dituzten diskurtso eta sentipenak identifikatu nahi
genituen eta horrekin batera egungo kooperatibak etorkizuneko proiektu
kooperatibo batera abiatzeko izan ditzakeen aukerak aztertzea. Horretarako
Eusko Jaurlaritzak eskaintzen dituen doktorego bekatara aurkeztu genuen
Fagor Arrasaten zentratutako proiektu zehatza. Beka eskuratu eta lanean
jardun genuen, 2005eko urtarriletik 2009ko uztailera arte.
Beka jaso izanak lana burutzeko baldintzak erraztu zizkidan baita neure
buruarekin eta Lanki Ikertegiko gainontzeko kideekin ere amaitzeko
konpromisoa ezarri ere. Lan hau egiterakoan kolektibo oso bat ezagutzeko
aukera izan dut, bertan arakatu eta sakontzeko, erakunde bateko tripak barrutik
ezagutu eta sentipenak ukitzeko.
Lan- kolektiboaren iritzi eta sentipenetan murgildu ondoren, ondorio
nagusietako bat izan da badagoela kooperatibagintzari buruzko diskurtso
eraikitzaile bat lan-kolektiboaren baitan, beste bi pertzepzio-multzorekin
nahasian. Eta diskurtso eraikitzaile horren presentzia kuantitatiboa
esanguratsua dela. Esanguratsua, lan hau abiatu genuenean pentsa
genezakeena baino sendoagoa.
Honek pentsarazten du kooperatibagintza biziberritzeko potentzial bat egon
litekeela. Aldi berean, ordea, aurreko ondorio horrekiko nolabaiteko
kontraesanean, ez dago etorkizuneko kooperatibagintza horren irudikapen
indartsurik. Zentzu horretan ez dugu diskurtso artikulaturik aurkitu. Etorkizunean
kooperatibagintzak nondik nora jo beharko lukeen argitzen duen maparik ez da
ageri. Badira, bai, etorkizunerako pistak, lan- kolektiboaren zati
esanguratsuetan mamitzen diren iritziak.
Hona iritsita, lan- kolektiboaren helduleku diskurtsiboen argazki osoago bat
eskaintzen du doktorego tesi honek, eta badirela hor helduleku esanguratsu
batzuk etorkizuneko kooperatibagintza pentsatzeko.
Aurrera begirako lanez pentsatzen jartzean, ez zaigu arnas luzeko ikerketarako
iradokizunik pizten. Beste aldarte batean jartzen gaitu ikasi dugunak: aurkitu
dugun iritzi eta sentipen multzo hauen gainean, XXI. mendeko
kooperatibagintza mondragoetarraren irudikapenak sustatzeko eta
esperientziak probatzeko unea dela iruditzen zaigu. Kooperatiba biziberritzeko
langileen eta laguntza- eragileen artean egin beharreko ekintza-ikerketa izan
daiteke hurrengo mugarria.