Diskurtso kooperatiboak langile-kolektiboan ... - Euskara

Atal enpirikoa
Azterketa kualitatiboa
4.1.4 Arrasaten kooperatibista sentitzea errazagoa da
Kooperatibista sentitzeko orduan, zein kooperatibaren araberakoa
izan daiteke sentimendu hori. Kooperatiba bateko kide izan ala
beste batean lan egin desberdina izan daiteke, kooperatibaren
izaera eta produktuak eragina izango luke. 2-2 partaidearen
iritziz Arrasaten kooperatibista sentitzea beste kooperatiba
batzuetan baino errazagoa da.
“gero ze kooperatibatan lana eitten dozun be.
Nik hemen Arrasaten kooperatibistia izatia ikusten
dot askoz be samurrau. Ni elektrodomestikuetan egongo
banitzake seguramente esango nuke ni jubilauko naiz
ez dakit zenbat urtekin da zortzi ordu ein da banoia.
Hamen samurra dala uste dot nik. Ha haundixa be zelan
ein dan, ta desinformazioa ere haundixaua da…”
(ET2;H2)
4.1.5 Gazteek ez dute kooperatiba eurena denik sentitzen
3-3 partaidearen iritziz gazteek ez dute eurek bizi zuten moduan
bizi kooperatiba. Euren sasoian beste mentalidade bat ei zegoen
eta eurek eurena sentitzen zuten kooperatiba. Bere iritziz gaur
egungo gazteek ez dute sinesten kooperatiba eurena denik.
“beste mentalidade bat zauen, daukagun buruan ha
guria zala, guria zala. Etxian bezela… berba ein
bihou tema baten inguruan eta danok gare etxian. Oin
nik pentsatzen dot gaztiak eztatozela mentalizauta
hau eurena be bai dala.” (ET3;H3)
Gazteei egozten die, kasu honetan lagun honek erantzukizun
guztia, baina nola mentalizatu behar dira? Eurena dela
sentitzeko besteek konpartitzen dutela sentitzea ere beharrezkoa
izan daiteke.
Horregatik, beste hauek eurek fabrika eta kooperatibak altzatu
zituztela gogorarazi diote, eta eurek dena eginda jaso dutela.
Zaila da eraikuntzan parte hartu ez duzun zerbaitekin bete
betean bat egin eta gainera zeure sentitzea.
“frabika hoietan egon zan jentiak azkenian
altxau ein zabien eta guri behintzet ez jaku tokau
holakoik. Eta ordun ikusiko da aber kapazidadia edo
sakrifikatzeko edo…” (ET3;H5)
“igual oin dator ez? Igual gu sartu ga eta dana
einda zuean. Eta igual ez dozu baloratzen hainbeste
ez? Eta zuek hainbeste urte eta zuek eraiki dozue
ezta?” (ET3;H2)
266