Diskurtso kooperatiboak langile-kolektiboan ... - Euskara

Atal enpirikoa
Eztabaida Taldeen azterketa
Gazte batzuentzat kooperatiba enpresa ulertzeko beste modu bat
da. Demokratikoagoa den heinean parte hartzeko aukerak daude eta
gainera aldaketarako giltza eta eskumena bazkideengan dago.
Beste kontu bat litzateke horretarako prestatuta dauden, edo eta
protagonista izateko jarrerarik edo nahirik dagoen Arrasateko
bazkideen artean.
Dena den, gazteetatik multzo batek kooperatiba zer den jakiteko
ibilbide bat egin beharra dagoela dio. Zaila dela kooperatiba
zer den ulertzea lehenengo egunetik, ez dutela formaziorik jaso
eta lanera sartzeaz bat ez dela sumatzen kooperatiba bat denik,
bestelako enpresan lan egin edo kooperatiban lan egin antzekoa
dela hasierako urteetan. Ibilbidetxo bat egin ostean aldiz,
zerbait desberdina sumatzen dela aitortzen dute baina
horretarako pertsonak sentsibilizazio bat izan behar duela.
Kooperatibako gaietan interesik ez duenak bere lana bete eta
horretara mugatu daiteke, bakoitzaren interesen araberakoa da,
erakundeek (kooperatibak zein gainegiturek) ez baitute ezer
berezirik egiten arlo horretan. Gazte hauei zerbaiten gose
direla sumatzen zaie, nahiz eta euren buruak kooperatibagintzari
dagokionez ezjakintzat dituzten.
Bada beste gazte multzo bat, areago, kooperatibarekiko interes
berezia duena. Eta aldi berean, kooperatibagintzari enpresa
egiteko modu justuago bat aitortzen diona. Kritikoak dira eta
kooperatiba koherenteago bat nahiko lukete, esaten dena eta
egiten denaren artean koherentzia gehiago. Dena den, kooperatiba
eraikitzeko gogoa eta atxikimendu ideologiko berezia antzematen
zaie.
5.2 Kooperatibista sentimenduaz
Kooperatibista sentimenduari dagokionean kooperatibista
sentitzeko modu ezberdinak aurkitu ditugu. Oraingo honetan
belaunaldien artean ere antzeman dugu desberdintasunik. Batzuk
oso kooperatibista sentitzen dira, beste batzuk kooperatibista
sentitzen dira baina idealismorik gabe. Kooperatiban lan egitea
egokitu zaielako eta bertan egindako ibilbidean hori ikasi eta
ikusi dutelako dira kooperatibistak, hauetako gehienak uste dugu
erdiko belaunaldikoak liratekeela (30-50 adin tarte ingurukoak).
Ildo beretik, bada bere burua kooperatibista desmitifikatutzat
kalifikatu duenik ere. Kooperatibista sentitzen da baina
idealismorik gabe, kooperatiban lan egitea egokitu zaiolako da
kooperatibista. Urteen poderioz kooperatibako giroaz kutsatu
dela aitortzen du baina ez du bere burua oso kooperatibistatzat.
Kooperatibista izateari alderdi praktikotik begiratzen dio.
Gazteak ere kooperatibista sentitzen dira baina ez dute uste
garai bateko bazkideek besteko ilusio eta sentimendurik dutenik.
Kooperatibista sentitzeko zerbait egin behar dela diote, bazkide
izate horrek soilik ez dakarrela horren gaineko sentimendurik.
315