Diskurtso kooperatiboak langile-kolektiboan ... - Euskara

Atal enpirikoa
Lehen hurbilpena
3. Lehen emaitzen interpretazioa
Atal honetan lehen hurbilpen honetan egindako lanaren emaitzak
jaso eta interpretatuko ditugu.
Horretarako, abiapuntu egokia izan daiteke ikerketa lanaren
helburu nagusia gogora ekartzea. Fagor Arrasate kooperatiba
Elkarteko kolektiboan kooperatiba eta kooperatibagintzaz dauden
diskurtso nagusiak identifikatu eta aztertzea da lanaren
helburuetako bat. Atal teorikoan, Arrasateko Kooperatiba
Esperientziak gaur egun bizi duen zentzu krisiaren inguruko
ajeen nondik norakoak aztertu ditugu. Zentzu krisiaren
diagnostikoa landu dugu, enpirikoaren atal honetan aldiz, zentzu
krisi horretan kooperatiba bateko kolektiboa nola kokatzen den
aztertu dugu diskurtso analisiaren bidez.
Hiru diskurtso identifikatu eta aztertu ditugu azterketa
kualitatiboaren lehen urrats honetan. Etsipenaren diskurtsoa
deitu duguna bata, Aurkako diskurtsoa bigarrena eta
Itxaropenaren diskurtsoa hirugarrena. Gatozen orain, hiru
diskurtso horien muina paragrafo banatan deskribatzera.
Etsipenaren diskurtsoak eszeptizismotik bizi du
kooperatibagintza. Garai baten zentzua izan zuena gaur egun ez
da eutsigarri. Etsita daude, zertarako esan edo egin zerbait
hori antzua izango bada?. XXI.mendeko mundu globalizatu honetan
merkatuak agintzen du, kanpo faktoreek eragin eta determinatzen
gaituzte. Onartu besterik ezin dugu egin. Baldintzak onartu eta
arlo enpresarialari eustea da gaur egungo kooperatibagintzaren
egiteko nagusia.
Aurkakotasunetik edo haserretik abiatzen den diskurtsoak
mesfidantza du sakonean. Ez da kooperatiba gidatzen dutenekin
fidatzen eta ez du ikusten eurengan inolako eragin ahalmenik
dagoenik. Halere, bestelako kooperatiba eta kooperatibagintza
batengan sinesten dute. Gaur egungo egoera “degradatua” da
atsegin ez dutena, inkoherentziaren aurka errebelatzen dira.
Teoriatik praktikara dagoen tarte zabala ez dute atsegin eta
hori da salatzen dutena. Tarte hori txikitzearen erantzukizuna
gehienbat kooperatiba gidatzen dutenengan dagoela uste dute.
Itxaropenaren diskurtsoan kokatzen direnek aldiz, indarra eta
eragiteko ahalmena pertsonarengan dagoela uste dute. Pertsona
eta kooperatibatan dagoen subiranotasuna eta autonomia elikatu
eta landu behar direla uste dute. Kooperatibagintza
biziberritzeko gogoa eta premia ere ikusten dute.
Ez da erraza diskurtsoak bereiztea, mugak ez dira oso argiak.
Seguruenik ez da diskurtso argi eta egituraturik eskaintzen.
Halere, muga eta guneak eskema grafiko baten bidez adierazten
ausartu gara, diskurtsoek euren artean eta bakarkako eremuetan
zer konpartitzen duten ikusteko baliagarria izan daitekeelakoan.
249