Diskurtso kooperatiboak langile-kolektiboan ... - Euskara

Atal teorikoa
Arrasateko Kooperatiba Esperientziaren oinarri filosofikoak
8. Gizarte eraldaketa
Arrasateko Kooperatiba Esperientziak, beste herri batzuekiko
solidarioa izanez, gizartea eraldatzeko borondatea erakusten du.
Horretarako, Euskal Herrian jarduten du, berreraikuntza
ekonomiko eta soziala lortzea eta euskal gizarte aske, bidezko
eta solidarioagoa taxutzea ahalbidetuko duen hedapen-prozesuaren
bitartez. Hauxe da hori lortzeko hautatutako bidea:
a) Lortutako Soberakin Garbi gehienak berinbertitzea: zati
handi bat izaera komunitarioko fondoetara bideratzen da,
araubide kooperatiboari atxikiriko lanpostu berriak
sortzea ahalbidetzeko.
b) Garapen komunitariorako ekimenei laguntzea, Hezkuntzako
eta Kooperatiba Sustapeneko Fondoaren bidez.
c) Sistema kooperatiboarekin koherentea den Gizarte
Segurantzako politika, solidaritatean eta
erantzukizunean oinarritua.
d) Jite ekonomiko eta sozialeko beste euskal erakunde
batzuekin lankidetzan aritzea, bereziki euskal
langileriak sustatutakoekin.
e) Euskara, hizkuntza nazionala den aldetik, eta euskal
kulturaren bereizgarriak suspertzen laguntzea.
Aipatu dugu logika enpresarial-instrumentalaren eta logika
etiko-sozialaren arteko oreka eraikitzeko saioa dela Arrasateko
Esperientzia. Zortzigarren printzipio honen sakonean enpresa
aberastasun ekonomikoa sortzeko egitura izatetik haratago,
pertsona eta komunitatearen garapenerako bide moduan ulertzen
duen paradigma dago.
Pentsamendu arizmendiarrean ekonomiak izaera instrumentala du:
ekonomia gizakiaren eta komunitatearen ongizatea lortzeko
bitartekoa da. Horretarako ezinbestekoa da efizientzia
ekonomikoa eta egitasmo kooperatiboaren iparra gizarte
eraldaketa da.
Efizientzia ekonomikoaren diskurtsoaren atzean, etika eta
ekonomiaren arteko harreman berri baterako planteamendua dago.
Kudeaketa eraginkorra ezinbesteko premisa izanda ere,
pragmatikotasun ekonomikoak arrazoibide etikoaren zerbitzura
jarri behar du.
Beraz, printzipio honek hurbileko komunitatera begira jartzen
gaitu. Kasu honetan Euskal Herria aipatzen du baina aldi berean
beste herriekiko elkartasuna erakutsiz.
Lehenengo a) puntuan lortutako soberakin garbietatik sortutako
fondoak berrinbertituz enplegu kooperatiboa sortzeko ahalegina
egingo dela diosku.
82