Diskurtso kooperatiboak langile-kolektiboan ... - Euskara

Atal teorikoa
Gaur egungo errealitatearen argazkia
h) Ordaintzeko orduan elkartasun zorrotza (batetik hirurako
eskala).
Horiek Alfonso Gorroñogoitiaren iritzian Esperientziak izandako
arrakastaren gakoak. Bere ustez, Arrasateko kooperatibismoan
dagoen kultura ekonomikoa da arrakastaren oinarri sendoenetako
bat. Dena den, Lankik egiten duen zerrendatzea aztertuko dugu
jarraian. Horra hor gakoak banan banan:
1. Arizmendiarrietaren lidergoa. Arizmendiarrietaren
gaitasunak, sortzeko eta etorkizuna irudikatzeko izan zuen
gaitasunak kooperatiba askoren sorreran eskuartzera eraman
zuen. Pertsonengan eragiteko gaitasuna, kontzientziak
mobilizatzeko eta pertsonak konprometitzeko gaitasuna.
Gizarte konpromisoan oinarritutako bizitza eredu bat izan
zen berea, eta sarri aipatu dugun moduan hezkuntza ereite
lan garrantzitsu bat egin zuen.
2. Autarkia ekonomikoa eta hedakuntza. Gerraosteko ekonomiak
produktu ugariren eskaera ekarri zuen. Produkzio beharra
zegoen, hedatzen ari zen ekonomia bat zen indarrean
zegoena. Autarkikoa zen indarrean zegoen erregimen
ekonomikoa eta ondorioz kanpoko produktuentzat mugak
itxita zeudenez, lehiakortasun mailak baxuak ziren eta
merkatuan sartzeko erraztasunak zeuden. Horrek hasi
berriak ziren kooperatibei lehiakorrak izan eta dirua
irabazteko aukera errazten zien.
3. Kode moral zorrotza. Sortzaileengan kode moral zorrotza
antzeman daiteke. Sorrerako definizioa honakoa zen: lan
munduaren duintasunarekin bat datorren enpresa eredua
sortzea. Ildo beretik, oinarrizko baloreak hauek zituzten:
lana, elkartasuna, austeritate instituzionala eta emaitza
kolektibo eta indibidualen arteko oreka. Hitzen eta
ekintzen arteko koherentzia mantentzeko ahalegina egitea
ere garrantzitsua zen. Aldi berean, eurek eredu izan behar
zuten eta eredugarritasunean oinarritutako bizitzak izan
dituzte.
4. Esperientziaren jatorriko baloreetan oinarritutako
araudia. Baloreak estatutu eta egitura operatiboetan
egikaratzen dira. Kooperatiben arlo instituzional, sozial
eta enpresariala oinarrizko arauen gainean eraiki dira.
Baloreek efikazia operatiboa lortu dute.
5. Enpresa efizientzia. Biziirauteko lehenengo baldintza
autosufizientziarako etekinak lortzea izan zen.
Gainontzeko asmo sozio-ekonomikoetarako oinarria da
enpresa efizientzia. Ez da bata edo bestea, baloreak eta
enpresas enpresa efizientzia eskutik joatea (kausa
harremana). Orekaren nozioa beharrezkoa da.
123