Diskurtso kooperatiboak langile-kolektiboan ... - Euskara

Atal enpirikoa
Azterketa kualitatiboa
1. Lehen hurbilpena: hiru diskurtso
1.1 Metodologia
Atal teorikoan aipatutako moduan kooperatiba eta
kooperatibagintzaren inguruko diskurtsoak jarri behar ditugu
azterketaren erdigunean. Egungo kooperatibistek kooperatibismoa
nola ikusten duten, nola formulatzen duten jakin nahi dugu. Eta
formulazio horretan zenbat ikuspegi desberdin multzoka
ditzakegun, zenbaterainoko adostasunak dauden, diskurtso
kontrajarririk dagoen. Nola hurbildu galdegai horietara?
Aipatu dugu planteamendu metodologikoan Fagor Arrasate aukeratu
dugula horretarako. Kooperatiba historikoa dugu Fagor Arrasate,
MCCren ‘ama’ den gunekoa. Arrasateko Esperientzian sortutako
bigarren enpresa da. Esperientzia honen ibilbide historiko osoa
dauka bere baitan, eta une honetan ere Fagor taldeko
erreferentzia-enpesetakoa da. Esku-langile zuzenen eta zeharkako
langileen azpi-kolektibo handi bana du bere baitan.
Kooperatibista historiko edo zaharren (hasierakoen) eta
belaunaldi gazteen ordezkaritza aurki dezakegu bere langileen
artean. Arrasaten lantegi zentrala dauka, eta baditu lantegiak
Markinan eta Donostian ere. Makina handien sektorean mundu
mailako merkatu konplexu batean lehiatzen da, eta bizi-bizirik
ditu egungo merkatu globalaren desafioek dakartzaten
gorabeherak. Arrazoi hauek guztiek Fagor Arrasate hautagai egoki
bihurtzen dute guk nahi dugun argazkirako.
Aukeratutako kooperatiba honetan, azterketa egin nahi diogu
arestian aipatutako baieztapen teorikoari: kooperatibagintzaren
zentzu krisiari. Honakook ditugu galdegai:
Zeintzuk dira Fagor Arrasaten kooperatibagintzaz egun dauden
diskurtsoak? Zeintzuk jarrera eta sentipenak? Zeintzuk dira
Fagor Arrasateko langileen “bizipen kooperatiboak”? Nola
irudikatzen dute etorkizuna?
1.2 Datu-bilketarako iturria
Galdera horien erantzunetara hurbiltzen hasteko, guk 2005-2006
bitartean egindako datu-bilketa bati heldu diogu, eta bertatik
emaitzak aztertzen saiatu gara. Fagor Arrasateko kooperatiba
Elkartean, 2005eko azaroaren eta 2006ko martxora bitartean
egindako saioetatik jaso dugu honako diskurtsoak eraikitzeko
materiala. Hamabost lagunez osatutako taldetan hiru orduz
kooperatibagintzaz egindako gogoetatan sortutako aktak ditugu
oinarri, kooperatibagintzaz dauden diskurtsoen bila hasteko.
Gogoeta hauetan, kooperatibagintza orokorrean lantzeaz gain,
gaur egungo kooperatibagintzak bizi dituen ajeen inguruko
irakurketa luzatzen genuen bileren dinamizatzaileok. . Ondoren,
talde-eztabaidak, horixe zuen gai nagusi: ze egoeran dagoen
226