Diskurtso kooperatiboak langile-kolektiboan ... - Euskara

Atal enpirikoa
Azterketa kualitatiboa
Diskurtso honek dirua ematea ondo ikusten du. Baina hortik
haratago joan nahi du. Gizartean zerbait egiten denaren
sentsazioa gaur egungo kooperatibagintzan motibazio iturri bat
izan daitekeela uste dute. Izan ere, gizartean eragiten duen
elkarte bateko kide izatea askorentzat harro egoteko moduko
arrazoia izan daiteke. Hortik gizarteari ematen zaizkion
laguntzak langileen artean jakinarazteko beharra.
“Gaur egungo beharrak zeintzuk dira? Ematen da
dirua baina nora doa? Ze hobetu badaukagu
motibazio hori hobetzeko (zerbait egiten denaren
sentsazioa). Motibazioa edukitzeko jakin egin
behar da, nori eta zertarako eman zaion”
(maiatzak 20)
Batzuentzat elkartasuna erabat instituzionalizatua dago, ondo
zehaztutako prozedurak zehaztu dira eta horrek ez dira kolokan
jartzen. Halere, dirua nori eta zertarako eman behar den
etengabe egin beharreko ariketa.
“Beharren arabera dirua non eman kontinuamente
egin beharko litzatekeen ariketa da.” (azaroak
26)
Era berean, indarrak batu eta zerbait potenteagoa egiteko aukera
ere egon daiteke. Kooperatiba batzuen irabazietako portzentai
bat elkartu eta proiektu jakin batzuk baliabide eta denbora
gehiagoz finantzatu ahal izatea.
“Adibidez, zortzi kooperatiba elkartu eta
Iparraldeko ikastolei irabazien %2 emango
bagenien… edo hirugarren munduarekin edo
etxebizitzekin zerbait egin…” (azaroak 5)
Diskurtso honek ere bere kezka nagusien artean dauka
nazioarteratzearena. Nazioarteratzeko gaia konplikatua da,
zerbait egin behar da. Etorkizuneko erronka garrantzitsuenetako
da. Gaur egun kooperatibagintzak bizi duen kontraesanetako bat
da: Euskal Herrian kooperatibak ditugu eta hemendik kanpo
enpresa kapitalistak. Kanpoko enpresekin egiten dena ez dute
oso ondo ezagutzen kooperatibatan baina hainbat zalantza sortzen
ditu.
“Zerbait pentsatu beharrean gaude. Merkatuaren
eraginez goaz, baina zein baldintzatan? Zerbait
egiten da? Ze kontratu motarekin? Zenbateraino
da hori onargarria?” ( azaroak 19)
Formula jakin batzuk ere planteatzen dira, esaterako, irabazten
den dirua kooperatibara ekarri beharrean bertan, jatorrizko
gizartean inbertitzea.
246