Diskurtso kooperatiboak langile-kolektiboan ... - Euskara

Atal enpirikoa
Emaitza orokorrak
Azterketa kuantitatibo bidez ere lanpostuko partehartzea
handitze aldera, ardurak asumitzeko prest egongo diren jakin
nahi izan dugu. Gehiengoa ardurak asumitzeko prest agertu da.
Gazteek erakutsi dute erresistentzia gutxien.
Lanpostuko partehartzea hobetzeko eta arlo honetan demokrazia
partehartzailea bultzatze aldera, erabakiguneak hurbiltzeko
metodoetan sakondu beharko litzatekeela uste dute diskurtso
eraikitzaile-pragmatikoan kokatu ditugunetako batzuek. Hauen
ustez, indize sistematan ere berdintasun handiagoa landu beharko
litzateke. Esate baterako, behin kargudun lanpostua utzita
indizea lanpostu berrira egokituz.
1.1.2.4 Gizarte konpromisoaz
Aipatu dugu kooperatibetan lan egiteko arrazoi edo motibazio bat
inguruneko arlo sozialeko ekimenei diruz laguntzea eta
lanpostuak sortzea dela. Gehiengoaren ustez bestelako enpresek
baino konpromiso sozial handiagoa dute kooperatibek (%72,6 ados
eta %13 erabat ados).
Gizarteko alor desberdinak kooperatibizatzearen alde lan egingo
duen mugimendua bultzatzea gustatuko litzaioke galdetutakoen
artetik %78ari. Gustatu bakarrik ez, etorkizunean horrela
gertatuko dela uste du %54ak eta 51-65 adin tartetik %90ak. Gai
honi dagokionean ere, adin tarte hau azaldu da baikorren.
Gaur egun egiten den fondo sozialen gaineko ezagutza zein den
jakin nahi izan dugu. Nahiko ondo ezagutzen dutela aitortu dute
gehienek. 51-65 adin tartekoek nahiko ondo edo ondo ezagutzen
dutela esan dute, beste adin tartekoek ez hain ondo.
Kooperatibak zein laguntza ematen dituen jakitea motibazio
elementu bat izan daitekeela uste du gehiengoak (%67a ados edo
erabat ados).
1.1.2.5 Hezkuntzaz
Hezkuntza kooperatiboari dagokionean oso kritiko agertu dira bai
eztabaida taldeetan zein galdetegian. Gehiengoaren iritziz orain
arte egindakoa ez da nahikoa izan, hauen ustez hezkuntza
kooperatiboaren defizita nabarmena izan da.
Ildo beretik, gehienek uste dute belaunaldi berriei ez zaiela
egoki transmititu kooperatibismoa.. Puntu honekin gazteak agertu
dira kritikoen; %80a baieztapenaren kontra agertu da.
Diskurtsoen azterketan ere aipatu dugu gazteak izan direla
kritikoenak gai honi dagokionean. Bestalde, 51-65 adin tartean
“ez ados/ez kontra” markatu du multzo batek, %40ak.
496