Diskurtso kooperatiboak langile-kolektiboan ... - Euskara

Atal teorikoa
Arizmendiarrietaren pentsamendua
Lehenengo saiakerak orduko Union Cerrejera enpresa boteretsuak
zuen Eskola gizarteratzearen bidetik joan ziren. Alferrikako
lana ordea, langilearen seme langile eta ingeniariarena
ingeniari izango zela erabat barneratua zuen gizarte hartan.
Hezkuntzaren garrantziaz jabeturik, garai hartako gazteekin
lanean hasiko da buru-belarri.
Arizmendiarrietarentzat hezkuntza zen emantzipazio ororen
giltza, pertsona eta komunitatea bere etorkizunaren gidari eta
erantzule bihurtuko zuena. Horregatik hezkuntza sozializatzeko
beharraz mintzo zen eta aski ezaguna dugu horretarako zerabilen
leloa “hezkuntza sozializatu beharra dago, boterea
demokratizatzeko.”
Hezkuntza integralaz hitz egingo du. Hezkuntzak bi alor
barnehartu behar ditu, alde batetik, hezkuntza teknikoa eta
bestetik etiko eta soziala. Arizmendiarrietak beti izan zuen
argi eta honela zioen: “la enseñanza y la educación son la
primera empresa de un pueblo”.
1.3 Lana
Bere pentsamenduaren giltzarri nagusiena dela esan dezakegu.
Lanaren gaineko oso ikuspegi aberatsa zuen Arimendiarrietak.
Lanaren ideia gehien garatu duten pentsalari praktikoenen artean
dago, ikuspegi zabal eta zorrotza zuen lanaren inguruan. Lana da
gakoa, pertsonak bere autoerrealizaziorako, bere burua
eraikitzeko, pertsona izateko. Eta aldi berean, komunitatearen
gakoa, gizarte hobe bat eraikitzeko tresna nagusia.
Lanari aitortzen zaion baliotik abiatuta, nola onartu lana
besterenganatzen duen enpresa eredu bat? Lana baldin bada
pertsonak bere eskura duen armarik baliotsuena, akats handia da
lanaren kontrola kapitalaren esku uztea. Pertsona ez bada bere
lanaren jabe, ez da bere tresnarik preziatuenaren erantzule.
Hortxe zegoen aldatu beharreko gakoa. Kooperatiba
arizmendiarraren printzipio nagusienetako bat lanaren soberania
da: lana da botere erabakitzailearen iturria, autoritatearen
sorburua. Kapitala berriz, lanaren zerbitzura dagoen tresna
instrumental hutsa da.
Gatozen ondorengo lerroetan lanaren kontzeptu arizmendiarrean
sakontzera, izan ere, lanak hasierako sortzaileengan zentzu
transzendental moduko bat izan zuen, eta horrek pentsamendu
arizmendiarrean lanak duen garrantzian du iturburua.
Arizmendiarrietak lanaren zentzuari esanahi zabala eman dio:
61