Verslag - NG Kerk in Oos-Kaapland

A.2.2 VERSLAG VAN DIE ALGEMENE DIENSGROEP DIENS EN
GETUIENIS: OPENBARE GETUIENIS
1. OPENBARE GETUIENIS AS DEEL VAN DIENS EN GETUIENIS
In die uitvoering van die opdragte van die vorige sinode het die Diensgroep onder die indruk gekom dat
talle opdragte ook n openbare getuienis-kant het. In die besinning oor die opdragte het dit verder duidelik
geword dat die openbare getuienisplig van die kerk op drie vlakke moet geskied naamlik die plaaslike
gemeenskap, die streek of provinsiale vlak en nasionaal. Dit is ook duidelik dat hierdie funksie veel eerder
in die ekumeniese verband uitgevoer moet word. Die Verenigde Diensgroep Diens en Getuienis het begin
met n studie oor openbare getuienis as deel van Diens en Getuienis. Die doel van die studie is om
praktiese riglyne te ontwikkel vir gebruik deur gemeentes.
2. KERK-STAAT VERHOUDING
2.1 Die kerklike maatskaplikediensteprogramme van die sinodes het sedert die totstandkoming van n
afsonderlike staatsdepartement vir Maatskaplike Welsyn in 1937 noue bande met die staat ontwikkel.
Aangesien die programme gemeenskapsbedieninge is, word dit in die gemeenskap gesien as deel van die
maatskaplike welsyns- en ontwikkelingsektor. Net soos ander welsynsorganisasies funksioneer die
kerklike maatskaplikediensteprogramme ook binne die staat se statutêre en beleidsraamwerke en om
effektiewe dienste te kan lewer is n funksionele verhouding met die staat en positiewe, instaatstellende
wetgewing en beleid nodig.
2.2 Daar is egter groot kommer oor die wyse waarop die ontwikkeling van die nasionale beleidsraamwerk
vir maatskaplike welsyn en -ontwikkeling vorder. Behalwe dat die vordering op die gebied traag is, is die ad
hoc manier waarop dit gebeur ontstellend. Dit veroorsaak dat verskillende beleide nie by mekaar aansluit
nie en soms teenstrydig is. Die Diensgroep is daarvan oortuig dat hier n geleentheid is waar die kerk nie
net haar openbare getuienisfunksie moet vervul nie, maar aktief kan saamwerk om oplossings te help vind
vir die samelewingsprobleme, n aangeleentheid waartoe die kerk haar in die Verklaring (2002) verbind
het. Alhoewel die ADD via die Kerklike Maatskaplike Dienste Raad betrokke is by die gesprek oor
maatskaplike welsyn en ontwikkeling, behoort dit nie losstaande te wees van die breë gesprek tussen die
Kerk en die Staat wat op die terrein van die Moderamen en die parlementêre lessenaar lê nie. Die ADD is
van mening dat dit ook n saak is wat deur die verenigde NG Kerkfamilie hanteer moet word.
3. KAPELAANSDIENSTE
(Handelinge 2004:366 pt.8.10.2)
Die Algemene Sinode dra ook die NG Kerk se verantwoordelikheid vir skakeling en samewerking met die
kapelaansdienste oor aan die Algemene Diensgroep Diensgetuienis en die AKGA.
3.1 Die Diensgroep kon nog nie vorder met die opdrag nie. Tot dusver het die Moderamen die skakeling
met die Kapelaansdienste hanteer. Gesprekke oor hoe om die opdrag die beste te hanteer, is tans tussen
die Diensgroep en die Moderamen aan die gang. Die behoefte aan beter skakeling is ook in die Verenigde
Diensgroep Diens en Getuienis deur van die ander kerke in die NG Kerkfamilie geopper en die ADD
oordeel dat n forum, waarin verteenwoordigers van al vier kerke in die NG Kerkfamilie dien, die beste
instrument sal wees om die opdrag uit te voer.
3.2 AANBEVELING: KAPELAANSDIENSTE
Die ADD ondersteun die aanbeveling van die Moderamen rakende die samestelling van die
Subkommissie vir Kapelaansdienste (vgl A.2.1 pt 4.4.4)
ÔÔÎ