hvítabók • fylgibind 2 fyrisiting - Løgmansskrivstovan

10 · Hvítabók – Fylgibind 2
Samandráttur og
niðurstøður
1. Løgmansskrivstovan
Økini, sum hoyra undir Løgmansskrivstovuna, verða í flestu førum
fíggjað og fyrisitin av heimastýrinum. Hóast staturin sambært heimastýrislógini
í flestu førum hevur ábyrgdina av økjunum, so er lóggávan
eisini lagað nakað til tørvin og viðurskiftini í Føroyum.
Í fyrstu atløgu verður á flestu økjum nóg mikið at lýsa galdandi
lóggávu sum føroyska lóggávu.
Kortini eru trý stór øki, sum seta krøv til bæði lóggávu, fyrisiting
og – ikki minst – fígging í sambandi við fullveldi. Hesi øki eru løgreglan
og ákæruvaldið, uttanríkismál og dómsvaldið.
Av tí at grundlógarnevndin, sum Løgtingið hevur sett, eisini skal viðgera
dómsvaldið, ger Løgmansskrivstovan ongar niðurstøður á hesum øki.
Løgregla og ákæruvald
Tað størsta av felagsmálunum undir Løgmansskrivstovuni er løgregla
og ákæruvald.
Ábyrgdin av økinum er donsk burturav, men hvat lóggávu viðvíkir,
metir Løgmansskrivstovan kortini ikki, at stórvegis trupulleikar verða
av at laga hana til fullveldið. Lógirnar, sum galda í Føroyum, eru lagaðar
nakað til føroysk viðurskifti, og í fyrsta umfari ber til at lýsa tær
sum føroyskar lógir.
Fyrisitingarliga verða ávís krøv; men hesi nýtast ikki verða so hørð
fíggjarliga; heldur er talan um eina fakliga krevjandi uppgávu.
Dagligi raksturin av løgregluni í Føroyum er rættiliga sjálvstøðugur;
men hóast føroyska løgreglan tekur sær av øllum dagligum virksemi,
so fær hon nógva tekniska og fakliga hjálp úr Danmark – serliga í
sambandi við stórar ella óvanligar uppgávur. Skal føroysk løgregla
kunna standa fyri hesum í framtíðini, verður tørvur á serútbúnaði og
starvsfólki við serligum útbúgvingum. Løgmansskrivstovan mælir
heldur til, at avtala verður gjørd við Danmark ella onnur lond um
útgerð, eftirútbúgving, kriminaltekniskar tænastur o.a.