hvítabók • fylgibind 2 fyrisiting - Løgmansskrivstovan

Almanna- og heilsumálastýrið · 343
2. Lóggáva
Lógin ásetir býtið av almannaútreiðslum millum landskassan og
kommunukassan. Av almannaútreiðslum verða 93,25% goldin úr
landskassanum og 6,75% goldin úr kommunukassanum. Landskassin
leggur út kommunupartin og fær hann afturgoldnan, soleiðis at í seinasta
lagi fyrsta apríl hvørt ár verður uppgjørt, hvussu nógv landskassin
skal hava aftur frá hvørjari kommunu sær fyri farna fíggjarárið, við at
50% verða roknað eftir seinasta fólkatali og 50% eftir skattainntøku í
kommununi seinasta árið.
Lógin fevnir um útreiðslur av:
• útgoldnari fólkapensión við viðbótum sambært „lov for Færøerne
om folkepension”
• útgoldnari avlamispensión og avlamisveiting við viðbót sambært
„lov for Færøerne om invalidepension”
• útgoldnari einkjupensión við viðbótum sambært „lov for Færøerne
i henhold til offentlig forsorg”
• barnaforsorgarútreiðslur sambært grein 43 stk. 2 og 3 í „lov for
Færøerne om børneforsorg”
• útgoldnari hjálp til einstaklingar sambært „lov for Færøerne om
offentlig forsorg”
• heimahjálparaskipanina sambært „lov for Færøerne om offentlig
forsorg“ og av heilsu- og heimasjúkrasystraskipanini
• útgoldnari veiting sambært „lov for Færøerne om børnebidrag til
enlige forsørgere m.v.”
• til rakstur av røktar-, ellis- og vistarheimum
• til rakstur av stovnum sambært grein 32 stk. 2 í „lov for Færøerne
om offentlig forsorg.”
Tá ið henda lógin varð sett í gildi, fóru løgtingslóg nr. 3 frá 6. januar
um býtið av útreiðslunum til heimasjúkrasystra-, heilsusjúkrasystra og
skúlalæknaskipanina og løgtingslóg nr. 98 frá 23. juni 1992 um býtið
av almannaútreiðslum úr gildi.
Lógin er føroysk løgtingslóg, t.e., at eingin lógarlig krøv verða sett í
sambandi við fullveldi.
3. Fíggjarlig ábyrgd
Landskassin og kommunurnar rinda útreiðslurnar sambært lógini.
Landskassans partur av útreiðslunum verður rindaður við blokkstuðlinum.