hvítabók • fylgibind 2 fyrisiting - Løgmansskrivstovan

92 · Hvítabók – Fylgibind 2
annars, og harumframt nýtir Dóms- og kirkjumálaráðið einans orku
til starvsfólkamál á økinum.
Akkurát hvussu nógv skal til av starvsfólki og peningi til at umsita
føroysku løgregluna, veldst sostatt nógv um, hvussu ein velur at skipa
uppgávurnar politiskt, og hvussu nógvar skipanir og fyriskipanir ein
velur at „læna“ ella keypa úr øðrum londum; men verður íslendska
loysnin vald, verður ikki talan um tey nógvu ársverkini. Verður hinvegin
danska loysnin vald, verður starvsfólkatørvurin størri, og við
honum eisini útreiðslutørvurin.
Hvørt nevnda meting upp á 8.394.131 kr. til leiðslu, fyrisiting og
sertænastur fer at halda ella ikki, veldst tí um, hvørjar politiskar avgerðir
verða tiknar um leiðslubygnaðin.
– – Aftur at umrøddu fjaldu útreiðslum kemur, at virksemið hjá løgregluni
er soleiðis skipað, at partar av útreiðslunum í sambandi við
greiningar í ítøkiligum málum ikki eru roknaðar upp í raksturin hjá
løgregluni yvirhøvur. Her er serliga talan um keyp av ymsum tænastum
(so sum grannskoðannarfrágreiðingum), sum hava beinleiðis
tilknýti til ítøkilig mál. Útreiðslurnar til hetta kunnu vera næstan ongar
og so upp í nakrar milliónir um árið. Tað fer neyvan at verða høpi
í at talseta eitt so skiftandi tal, men siga vit 5 mió. kr. í miðal, er ið
hvussu er ríkiligt lagt uppfyri.
Nýggj virkisøki
Væntandi er, at fullveldið í sjálvum sær økir nakað um uppgávurnar
hjá løgregluni, tí við tí koma útlendskar sendistovur og umboðsstovur
til landið, og almennu vitjanirnar verða títtari og størri. Trygdar-, eftiransanar-
og fyriskipanaruppgávurnar, sum koma av hesum, kunnu fara
at nerva dagliga raksturin nakað, tí liðið er til tað fáment, og summar
almennar vitjanir krevja lutfalsliga stóra løgreglumanning í styttri tíð.
Væntandi fer hetta tó ikki at tyngja stórvegis um raksturin.
Í hesum sambandi er vanligt við millumtjóða trygdarsamstarvi,
herímillum fregnartænastusamstarvi.
Lítið er upplýst um samstarv við PET. Tó upplýsir heimasíðan hjá løgregluni,
at í hvørjum løgregludømi er tilnevnt eitt fólk, sum hevur ábyrgdina
av samskiftinum við PET, og soleiðis er ivaleyst eisini í Føroyum.
Lítla, gjøgnumskygda samfelagi okkara tørvar neyvan eina fregnartænastu;
men fyri at fáa í lag neyðuga samstarvið við trygdar- og
fregnartænastur í øðrum londum, er helst neyðugt við eini lítlari tænastueind,
har serligt trúnaðartilfar ikki kemur at verða viðgjørt í vanligu
arbeiðsgongdunum hjá løgregluni annars, so at trygdartænastur
í øðrum londum kunnu líta á, at upplýsingar, sum verða latnar føroysku
eindini, eru í tryggum hondum.