hvítabók • fylgibind 2 fyrisiting - Løgmansskrivstovan

22 · Hvítabók – Fylgibind 2
on), vegna Føroyar og Grønland, men føroyingar og grønlendingar
hava í felag myndað ta donsku sendinevndina. Fiskimálastýrið mælir
til, at Føroyar sum fullveldi gerast limur í báðum felagsskapum.
Hvat viðvíkir sáttmálanum um at varðveita laksin í Norðuratlantshavi,
NASCO, er støðan tann sama.
Vit hava í hesum felagsskapum arbeitt sjálvstøðugt, og Fiskimálastýrið
mælir tí til, at Føroyar sum fullveldi fáa sjálvstøðugan limaskap.
Tað fer ikki at krevja umsitingarliga ella fíggjarliga meirorku.
Viðvíkjandi hvalaveiðu eru tveir fleirtjóða felagsskapir: IWC, (International
Whaling Commission), og NAMMCO (North Atlantic Marine
Mammal Commision). Í tí fyrra umboðar Danmark alt ríkið, og hetta
kann vera óheppið fyri føroyingar, tí Danmark ikki altíð hevur somu
støðu sum vit á økinum. Í tí seinna eru Føroyar sjálvstøðugir limir.
Fiskimálastýrið mælir til, at vit sum fullveldi vera við í NAMMCO,
men spurningurin um limaskap í IWC má takast upp alt eftir tørvi.
Hvat limagjaldi viðvíkir, fer fullveldi ikki at hava við sær stórvegis
meirkostnað. Føroyar rindað longu limagjaldið Danmarkar vegna í
bæði ICES, NEAFC, NAFO, NAMMCO og NASCO. Hetta kostar
um leið eina millión til samans árliga.
Danmark rindar kortini limagjaldið í IWC, so í hesum føri verður
møguliga ein lítil øking í útreiðslunum.
Av teimum uttanríkismálum, ið knýta seg til sjóvinnu, er tað serliga
arbeiðið í havfelagsskapinum undir ST, IMO, (International Maritime
Organisation), sum hevur stóran týdning fyri føroyska sjóvinnu.
Í hesum felagsskapi arbeiða fleiri tekniskar nevndir, sum eru mannaðar
við fólki frá teimum ymsu sjóvinnumyndugleikunum og serfrøðingum
á teimum ymsu økjunum. Krøvini verða ásett í altjóða sáttmálum,
sum Danmark hevur samtykt at seta í gildi fyri Føroyar eftir
tilmæli frá heimastýrinum.
Eins og fleiri onnur aðalstýri, mælir Fiskimálastýrið til, at vit sum
fullveldi gerast limir í IMO.
4. Vinnumálastýrið
Vinnumál eru fyri mesta partin yvirtikin av heimastýrinum, bæði
hvat viðvíkir fígging, lóggávu og umsiting. Økini, sum framvegis eru
felagsmál, eru mest smáøki, har føroyskir myndugleikar uttan stórvegis
trupulleikar eiga at kunna átaka sær uppgávurnar.
Tó er eitt stórt øki – flogferðslan – sum framvegis er danskt burturav.