hvítabók • fylgibind 2 fyrisiting - Løgmansskrivstovan

Løgmansskrivstovan · 89
• Radio- og motordeildin heldur og mennir radioskipanina hjá løgregluni
og letur øll motorakfør.
• Útgerðardeildin letur búnar og aðra útgerð, innbúgv og skrivstovuamboð.
• Deildin fyri útfyllingarbløð letur og bøtir um útfyllingarbløð og
skrivstovunýtslulutir, og letur faklesnað.
• Teldudeildin heldur og mennir allar telduskráir og telduskipanir
í Føroyum, og løgreglan í Føroyum hevur beinleiðis atgongd til
miðsavnaðu dátugrunnarnar, bæði at skráseta og at leita eftir
upplýsingum. Dátugrunnarnir eru: Registeret for efterlyste køretøjer,
Centralregisteret for motorkøretøjer, Legitimationskontoret,
Registeret for parkeringsafgifter, og Kriminalregisteret.
Harumframt veita aðrar deildir eisini nakrar minni tænastur
• Grannskoðanardeildin grannskoðar roknskapirnar hjá løgregluni
• Altjóða deildin og Interpol veita ikki føroyska liðnum so mangar
beinleiðis tænastur; men óbeinleiðis eru ágóðar av hesum.
• Kunningartænastan hjálpir eftir áheitan
• Leitingartænastan hjálpir eftir áheitan
• Bygningstænastan hevur eftirlit við, hvussu bygningarnir verða
hildnir
• Í serligum førum er samstarv við PET, mest í sambandi við metingar
undan vitjanum uttaneftir.
Útbúgving
Á útbúgvingarøkinum hevur borið til at fingið rættiliga neyv tøl og
tískil at gera rættiliga neyvar metingar.
Um útbúgving: Onga aðra staðni í samfelagnum merkir hin einstaki
so ítøkiliga tann myndugleika, sum vit í samfelag hava latið hinum
almenna, sum tá ið løgreglan kemur upp í leikin.
Tí er umráðandi, at hon virkar eftir ætlan, hvørki meira ella minni.
Fyri ein part ber til at tryggja bæði hin einstaka og løgreglustarvsfólk
við reglum og øðrum fyriskipanum; men við teimum stóru krøvum,
sum vit seta løgregluni nú á døgum, nytta reglur og fyriskipanir lítið,
um løgregluliðið ikki er væl útbúgvið, bæði tá um grundútbúgving
og um seinni útbúgvingar ræður.
Soleiðis er í øllum demokratiskum samfeløgum, men ætla vit at hava
so fá starvsfólk í løgregluni, sum til ber, mugu yvirskipaðu starvsfólkini
helst hava betri og breiðari útbúgvingarstøði enn aðrastaðni. Tá høvdu
tey førleika á fleiri økjum, so at so fá ársverk sum gjørligt, vóru bundin
at yvirskipaðu uppgávunum, og av tí sama var mest møgulig starvsfólkaorka
tøk til týdningarmestu uppgávurnar hjá liðnum.