hvítabók • fylgibind 2 fyrisiting - Løgmansskrivstovan

Løgmansskrivstovan · 93
Hendan eind kundi helst samstundis umsitið millumtjóða samstarvið
annars (sí niðanfyri).
Sum fullveldi er sjálvsagt, at Føroyar eru við í millumtjóða løgreglusamstarvi
sum INTERPOL, og trúliga eisini í Schengensamstarvinum
9 . Við vaksandi altjóðanini á øllum økjum, fáa hesi samstørv alt
størri týdning, og samstundis krevur luttøka í verkligum millumtjóðasamstarvi
bæði serligar fortreytir og lutfalsliga nógva arbeiðsorku. Tí
er neyvan heilt burturvið at vænta, at millumtjóða samstarv fer at
krevja upp til eini 3-4 ársverk afturat, sum væntandi kosta 1,5-2 mió.
um árið í rakstri.
Samandráttur
Útreiðslurnar á løgregluøkinum
Væntandi verða útreiðslurnar á løgregluøkjunum 45 mió. til vanligan
rakstur, 8,4 mió. til leiðslu og sertænastur, 2,6 mió. til útbúgvingar, 5
mió. til serligan greiningarkostnað og 1,5-2 mió. afturat til starvsfólk
til millumtjóða samstarv. Til samans um leið 63 milliónir.
Hvussu stórur partur av teimum 8,4 milliónunum til leiðslu og
sertænastur fara at stava frá starvsfólki, og hvussu nógv fer at stava
frá veitingum, sum fingnar verða uttanlands, veldst um, hvørjar skipanarligar
loysnir verða valdar politiskt.
Væntandi koma útreiðslurnar til løgregluna javnan at skifta minst
10% upp og niður, alt eftir hvørji mál krevja sertænastur uttaneftir.
Talan er um eitt heilt stórt øki og av størsta samfelagsliga týdningi
bæði so og so. Fyrisitingin er ikki sloppin at greina økið neyvari, men
kortini er eysæð, at áðrenn málsøkið kemur undir føroyskt málsræði,
krevjast gjølligar fyrireikingar, og avtalur mugu verða gjørdar um virksemið
í eini rættiliga langari skiftistíð, tí føroyskir myndugleikar hava
onga servitan um økið.
Avbjóðingarnar liggja sostatt ikki so nógv í tí fíggjarliga, sum í at
skipa økið skynsamiliga, og at fáa til vega og halda við líka tann yvirskipaða
førleikan.
– Viðmerkt verður, at tænastumannaeftirlønirnar til løgreglufólk ikki
eru nevndar, tí tær hoyra ikki til raksturin av sjálvum økinum, og tí
at danski staturin sum arbeiðsgevari hevur átikið sær skyldurnar at
gjalda tænastumonnunum hesar eftirlønir. Hendan privatrættarliga
avtala – sum í grundregluni er millum einstaka arbeiðstakaran øðrumegin
og danska statin sum arbeiðsgavara hinumegin, kann hvørki
verða ávirkað av ríkisrættarligu støðuni, ella hvør framyvir verður
arbeiðsgevari.
9 Útreiðslurnar av limaskapi eru roknaðar upp í partin um uttanlandsmál.