hvítabók • fylgibind 2 fyrisiting - Løgmansskrivstovan

Kapittul 2
Almanna- og heilsumálastýrið · 275
Fólkatingslógir, settar í gildi fyri Føroyar
Serforsorgin
Hesin kapittul snýr seg serliga um lógir, sum eru samtyktar á Fólkatingi,
men sum eisini skula galda í Føroyum. Ymsar mannagongdir
eru í sambandi við hesar lógir, men tær vanligu eru hesar báðar:
• Í donsku lógini verður ásett, at lógin hevur ikki gildi í Føroyum,
men at lógin kann verða sett í gildi við kongligari fyriskipan. Lógin
verður hereftir lagað til føroyskar umstøður, verður løgd fyri
Løgtingið til samtyktar og fær gildi í Føroyum, tá hon er lógliga
kunngjørd her. (Kongelig anordning nr. … af … om ikrafttræden
på Færøerne af lov om …”).
• Ein serlig lóg fyri Føroyar, sum er skræddaraseymað til føroysk
viðurskifti, verður samtykt á Fólkatingi. Lógin fær gildi í Føroyum,
tá hon er kunngjørd eftir teimum reglum, sum galda her,
t.e., at hon eisini er kunngjørd í Føroyum (”Lov nr … af … for
Færøerne om …”).
L.nr. 719 af 18.11.1987 om udlægning af særforsorgen m.v. på Færøerne.
1. Fyrisitingarligir myndugleikar og uppgávur
Sambært lógini eru fyrisitingarligu myndugleikarnir heimastýrið og
Skúlin á Trøðni. Síðan lógin kom í gildi, eru tó framdar bygnaðarbroytingar
í almennu umsitingini, sum hava ført við sær, at fyrisitingarmyndugleikarnir
nú eru landsstýrismaðurin í almannamálum, Skúlin
á Trøðni og Serforsorgin, (sum er partur av nýggjum stovni:
„Heimarøktin og serforsorgin”).
Serforsorgin hevur ábyrgdina av øllum viðurskiftum hjá brekaðum,
bæði tá talan er um viðgerð, arbeiði og upplæring. Eisini hevur Serforsorgin
eftirlit við bústovnum og verkstøðum fyri brekað.
Uppgávan hjá Skúlanum á Trøðni er at undirvísa og uppvenja tey
brekaðu, og landsstýrismaðurin í almannamálum hevur ábyrgdina av
at gera útfyllandi lógararbeiði, t.e. kunngerðir, reglugerðir o.a., sum
viðvíkir brekaðum.