hvítabók • fylgibind 2 fyrisiting - Løgmansskrivstovan

322 · Hvítabók – Fylgibind 2
lógir og aðrar skipanir so sum forsorgarlógin og avsláttur við strandferðsluni,
dekka sama endamál.
Hinar viðbøturnar, fyritíðarviðbótin, óarbeiðsførisviðbótin og
pensiónsviðbótin, verða lagdar saman til eina viðbót. Ætlanin er, at
viðbótin til fólkapensiónistar í minsta lagi skal svara til pensiónsviðbótina,
sum er. Viðbótin til hægstu fyritíðarpensión skal í minsta lagi
svara til pensiónsviðbót, fyritíðarviðbót og óarbeiðsførisviðbót til
samans, viðbótin til miðal fyritíðarpensión skal svara til pensiónsviðbót
og fyritíðarviðbót til samans, og viðbótin til lægstu fyritíðarpensión
skal svara til pensiónsviðbótina í dag. Upphæddirnar verða
ásettar í serligari løgtingslóg.
Reglur um, hvat hendir við pensiónini, tá ið pensiónistur fær uppihald
á ellis- og røktarheimi, stovni sambært forsorgarlógini ella líknandi
almennum ella alment góðkendum stovni, umframt reglur um
gjald fyri uppihaldið, verða gjørdar í serligari løgtingslóg, sum verður
løgd fyri ting í næstum.
Nógvir myndugleikar eru við í fyrisitingini av pensiónum eftir galdandi
lóg: Kommunustýrið, sýslumenn, Føroya landfúti, Almanna- og
heilsumálastýrið (eisini í einstaklingamálum), Vanlukkutryggingarráðið
og Almannastovan. Eftir uppskotinum koma einans Almannastovan
og Vanlukkutryggingarráðið at hava fyrisitingina av einstaklingamálum.
Den Sociale Ankestyrelse í Danmark er kærumyndugleiki fyri avgerðir
hjá Vanlukkutryggingarráðnum um avlamispensión. Henda
skipan kann halda fram, hóast eingin áseting er um tað í rammulógini.
Eftir avtalu tryggjar Almannamálaráðið, at fyritreytirnar fyri tí eru
í lagi. Donsku myndugleikarnir gera neyðugar tillaðingar í reglunum,
soleiðis at avgerðir hjá Vanlukkutryggingarráðnum um fyritíðarpensión
fyri avlamni framhaldandi kunnu verða kærdar til Sociale
Ankestyrelsen. Landsstýrismaðurin hevur tó heimild til at leggja
henda kærumyndugleika til kærunevndina í almannamálum.
Ásetan og javnan av almannaveitingum
Ll. nr. 105 frá 29.12.98.
1. Fyrisitingarligir myndugleikar og uppgávur
Fyrisitingligu myndugleikarnir eru landsstýrismaðurin í almannamálum
og Almannastovan.
Landsstýrismaðurin í almannamálum kann áseta neyvari reglur á
økinum.
Almannastovan umsitur lógina.