hvítabók • fylgibind 2 fyrisiting - Løgmansskrivstovan

Kapittul 1
1.1. Samandráttur og niðurstøður
Fiskimálastýrið · 137
Lógarøkini, sum Fiskimálastýrið umsitur, og har føroysk og donsk lóggáva
eru samantvinnaðar, kunnu í høvuðsdráttum liðast sundur í
tríggjar partar: fiskivinnumál, sjóvinnumál og skrásetingarmál, og er
tað serliga á teimum báðum seinni nevndu, at talan er um danska
lóggávu, sum er sett í gildi í Føroyum, og í ávísum førum eisini um
beinleiðis danska fígging. Fiskivinnulóggávan er øll føroysk, tá ið undantiknar
eru ásetingar um fiskimark og uttanríkisøkið, og tí verður
hon ikki nógv viðgjørd í hesi frágreiðing.
Eins og sæst í frágreiðingini, er tað í sambandi við fiskivinnumál
serliga talan um lóggávuna um „Danmarks Riges Fiskeriterritorium“
og kunngerðina um „Fiskieriterritoriet ved Færøerne.“ Tað er henda
lóggáva, sum ásetir fiskimarkið um Føroyar. Til tess at útinna eftirlit
og bjarging á sjónum hava Fiskiveiðueftirlitið og Færøernes
Kommando røkt uppgávuna í felag. Í sambandi við fullveldi verður tí
neyðugt, at gjørd verður føroysk lóggáva um fiskimarkið, og at Fiskiveiðueftirlitið,
umframt at taka sær av eftirliti og bjarging á sjónum,
eisini røkir uppgávuna at verja sjómarkið, t.e. at hevda fullveldið.
Sambært § 8, stk. 3 og 4 í heimastýrislógini og sambært siðvenju
hevur heimastýrið í ávísum førum heimild at tingast við og gera avtalur
við onnur lond. Hetta er m.a. galdandi fyri fiskivinnuavtalur og
millumlandasáttmálar, og verður tað vanliga gjørt við hjálp frá donsku
uttanríkistænastuni. Í sambandi við fullveldi eiga Føroyar beinanvegin
at biðja um sjálvstøðugan limaskap í millumlandafelagsskapunum
NAFO, NEAFC, NASCO, ICCAT og NAMMCO og í millumlanda
havrannsóknarráðnum ICES. Sum er gjalda Føroyar fyri limaskap í
nevndu felagsskapum, og fer sjálvstøðug umboðan tí ikki at hava
fíggjarligar meirútreiðslur við sær. Spurningurin um limaskap í IWC
má takast upp alt eftir tørvi. Limagjaldið í IWC verður sum er, rindað
av Danmark.
Lóggávan um sjóvinnumál er lutvíst donsk og lutvíst yvirtikin sum
føroyskt sermál. Tá ið skipaeftirlit er undantikið, umsita føroyskir
myndugleikar alla lóggávuna, tó at hetta verður gjørt í samstarvi við
danskar myndugleikar, kanska serliga í sambandi við lóggávuarbeiði í
altjóða nevndum og ráðum.