hvítabók • fylgibind 2 fyrisiting - Løgmansskrivstovan

132 · Hvítabók – Fylgibind 2
Tí eigur at verða samráðst við danir um samstarv, so føroysku peningastovnarnir
framhaldandi vera við í skipanini við somu rættindum
og skyldum, sum teir donsku.
Krøv til fígging, tá ið málsøkið gerst føroyskt
Í Búskaparmálaráðnum er deild, sum varðar og umsitur økið, ið sostatt
er fíggjað av ríkismyndugleikunum.
Í Føroyum umsitir ein fulltrúi í Fíggjarmálastýrinum økið saman
við øðrum málum, so har verður ikki stórvegis broyting, men roknast
kann við, at umsitingin her verður nakað størri.
Hinir partarnir av økinum, t.d. Fíggjareftirlitið, verða í høvuðsheitum
rindaðir av peningastovnunum. Í banka- og sparikassalógini er
ásett, at peningastovnarnir rinda tað eftirlit, sum staturin hevur. Gjaldið
frá tí einstaka peningastovninum verður ásett eftir skuld og ábyrgd.
Tað eftirlit, sum Fíggjareftirlitið eftir virðisbrævahandilslógini hevur
við øðrum virkjum, verður goldið av hesum virkjum, og gjaldið
verður ásett eftir tí orku, sum nýtt verður til eftirlitið.
Útreiðslurnar til innsetaratrygdargrunnin rinda peningastovnarnir
og ikki tað almenna. Lógin um fyribyrgjandi tiltøk móti peningahvítting
hevur ikki almennar útreiðslur við sær, men ásetir reglur fyri fíggjarstovnar
um, hvussu teir skulu fyribyrgja peningahvítting.
Samanumtikið kann verða sagt, at verður hildið fast um ta meginreglu,
at eftirlit og partar av fyrisiting annars verða fíggjað av stovnunum,
hevur tað ikki við sær stórvegis útreiðslur fyri landskassan, tá
ið málið gerst føroyskt.
Tó kann roknast við, at eitt føroyskt fíggjareftirlit kemur at kosta
tí almenna nakað.
Sum er, gjalda føroysku peningastovnarnir smáar upphæddir til
fíggjareftirlit, av tí at teir eru so smáir aftur ímóti donsku peningastovnunum.
Upphæddirnar, teir nú gjalda, eru ikki nóg mikið til eitt
sjálvstøðugt, føroyskt fíggjareftirlit.
Tryggingareftirlitið kostar í løtuni á fíggjarlógini 1/2 millión krónur.
So leingi støða ikki er tikin til, hvussu føroyska fíggjareftirlitið skal
verða skipað, og heldur ikki, hvørjar uppgávur skulu verða lagdar til
eftirlitið, er ikki lætt at meta um kostnaðin. Men roknað má verða
við, at tað kostar nakað av almennum peningi, umleið 3 milliónir
krónur, íroknað ta 1/2 milliónina til tryggingareftirlitið, sjálvt um
hildið verður fast við, at stovnarnir fíggja eftirlitið so nógv, sum gjørligt
er.