hvítabók • fylgibind 2 fyrisiting - Løgmansskrivstovan

330 · Hvítabók – Fylgibind 2
sjúkrahúsum verður ókeypis viðgerð veitt fólki, ið býr uttanlands,
men sum er í Føroyum fyribils, at summar viðgerðir verða veittar
ókeypis, sama, hvar sjúklingurin býr, at í serligum førum kann gjald
verða álagt fyri ávísar viðgerðir og veitingar ella fyri viðgerð á ávísum
stovnum. Harumframt kann landsstýrismaðurin áseta reglur um fólk,
sum sambært hesi lóg ikki hevur rætt til ókeypis viðgerð, reglur um
flutning ella ferðaendurgjald til sjúklingar, sum við samtykt frá sjúkrahúsverkinum
fara úr Føroyum at fáa viðgerð í øðrum londum, reglur
um at rinda aðrar útreiðslur í sambandi við at sjúklingar, sum við
samtykt frá sjúkrahúsverkinum verða sendir úr Føroyum til viðgerðar
í øðrum londum, og reglur um, í hvørjum øðrum førum flutningur
ella ferðaendurgjald verða latin. Landsstýrismaðurin kann áseta mark
fyri ferðaútreiðslunum og áseta neyvari reglur um, hvussu flutningur
og ferðaendurgjald verða veitt, umframt onnur gjøld fyri aðrar neyðugar
ferðaútreiðslur í sambandi við hetta.
Landsstýrismaðurin er eisini kærumyndugleiki í avgerðum, sum
leiðslan fyri sjúkrahúsverkið hevur tikið um rætt til viðgerð, flutning
ella ferðaendurgjald. Kært skal verða innan 4 vikur eftir, at kærarin
hevur fingið fráboðan um avgerðina. Landsstýrismaðurin kann áseta,
at heimildin hjá honum sum kærumyndugleiki kann verða løgd til
eina kærunevnd.
Uppgávan hjá Sundhedsstyrelsen sambært lógini er at hava eftirlit
við føroyska sjúkrahúsverkinum.
Viðvíkjandi teimum myndugleikum, sum sambært lógini eru føroyskir,
verður eingin broyting í støðuni, um vit fáa fullveldi.
2. Lóggáva
Lógin ásetir reglur um tey trý sjúkrahúsini: Landssjúkrahúsið, Klaksvíkar
sjúkrahús og Suðuroyar sjúkrahús. Lógin ásetir eisini reglur um
læknavirksemið á sjúkrahúsunum og um rættin hjá borgarum til veitingar
í sjúkrahúsverkinum.
Føroyingar hava uppfylt rammulógina á hesum øki við at seta løgtingslóg
í gildi. Sostatt verða eingi krøv sett til lóggávu í sambandi
við fullveldi. Tó verður viðmerkt, at fleiri kunngerðir enn ikki eru
tillagaðar til sjúkrahúsverkið. Ætlanin er at gera hetta sum skjótast,
av tí at nógv ivamál dagliga eru í sjúkrahúsverkinum, við tað at økið
ikki er nóg reglusett.
Kunngerðir, settar í gildi sambært lógini:
– K. nr. 104 frá 22.06.1995 um flutnings- og ferðaendurgjald til
sjúklingar innanoyggja.
– K. nr. 124 frá 23.10.1996 um sjúkrahúsráð, seinast broytt við K.
nr. 74 frá 12.10.1998 (Eisini broytt við K. nr. 27 frá 25.03.1997).