hvítabók • fylgibind 2 fyrisiting - Løgmansskrivstovan

2 – Hvítabók – Fylgibind 2
Samandráttur og niðurstøður · 17
taka við teirri ábyrgd og tí myndugleika, sum danski búskaparmálaráðharrin
nú hevur sum ovasti fyrisitingarligi myndugleiki á økinum.
Tann týdningarmesti stovnurin, tá um eftirlit ræður, er Fíggjareftirlitið.
Hann hevur umsjón við, at ásetingarnar í lógum og kunngerðum
verða hildnar.
Í einum føroyskum fullveldi skal eitt føroyskt fíggjareftirlit hava
tær uppgávur, sum danski stovnurin higartil hevur røkt í Føroyum.
Føroyska fíggjareftirlitið eigur, umframt av hava eftirlit við bankum
og sparikassum, at hava eftirlit við tryggingarfeløgunum og øðrum
fíggjarligum stovnum og grunnum. Danska fíggjareftirlitið hevur t.d.
havt eftirlit við Framtaksgrunninum og Fíggingargrunninum.
Eftirlitið við gjaldskortum kundi eisini ligið hjá føroyska fíggjareftirlitinum.
Umframt sjálva eftirlitsuppgávuna hevur danska fíggjareftirlitið frá
búskaparmálaráðharranum fingið til uppgávu at gera ein part av
teimum neyðugu kunngerðunum á økinum. Fíggjarmálastýrið skjýtur
upp at gera tað sama í Føroyum, tí eisini í føroyska fíggjareftirlitinum
verður tann neyðugi yrkisførleikin.
Kortini verður mælt til, at føroyska fíggjareftirlitið ger samstarvsavtalu
við danska fíggjareftirlitið ta fyrstu tíðina. Hetta kann vera
praktiskt, bæði tí danska fíggjareftirlitið hevur havt eftirlit við okkara
peningastovnum higartil, og tí føroyska lóggávan fer at líkjast mest tí
donsku – ið hvussu er ta fyrstu tíðina.
Fíggjarmálastýrið metir, at tað fer at taka eitt til hálvt annað ár, til
eitt føroyskt fíggjareftirlit kann virka sjálvstøðugt.
Kostnaður
Í høvuðsdráttum rinda peningastovnarnir fyri fíggjareftirlitið. Í bankaog
sparikassalógini er ásett, at peningastovnarnir skulu rinda fyri tað
eftirlit, sum staturin ger. Gjaldið hjá tí einstaka peningastovninum
verður ásett eftir skuld og ábyrgd.
Tað eftirlit, sum Fíggjareftirlitið eftir virðisbrævahandilslógini hevur
við øðrum virkjum, verður goldið av hesum virkjum, og gjaldið
verður ásett eftir tí orku, sum brúkt verður til eftirlitið.
Tó er at vænta, at eitt føroyskt fíggjareftirlit kemur at kosta tí almenna
nakað. Sum er, gjalda føroysku peningastovnarnir smáar upphæddir
fyri fíggjareftirlit, av tí at teir eru so smáir afturímóti donsku
peningastovnunum. Hesar upphæddir eru ikki nóg mikið til at fíggja
eitt sjálvstøðugt, føroyskt eftirlit.
So leingi støða ikki er tikin til, hvussu føroyska fíggjareftirlitið verður
skipað, og hvørjar uppgávur tað skal hava, ber illa til at meta um
kostnaðin. Men sjálvt um hildið verður fast við, at stovnarnir skulu
fíggja sum mest av eftirlitinum, má roknast við, at tað fer at kosta