hvítabók • fylgibind 2 fyrisiting - Løgmansskrivstovan

Niðurstøða
Fiskimálastýrið · 159
fíggjarlógini, og partvíst brúkarafíggjaður við gjøldum fyri skráseting.
Annars verður økið fíggjað úr Danmark.
Allar lógir, sum Skráseting Føroya umsitur viðvíkjandi partafelagsskráseting
o.ø., eru danskar ríkislógir. Landsstýrið hevur tó gjørt og
sett í gildi fleiri kunngerðir á økinum. Lógarøkið verður fíggjað lutvíst
við brúkaragjøldum og lutvíst yvir fíggjarløgtingslógina. Tað merkir
tí, at talan verður ikki um eykakostnað í sambandi við fullveldi.
2.2. Sáttmálar
Fiskivinnumál
Millumlanda fiskiveiðuavtalur
Føroyar hava fiskivinnusamstarv við øll grannalond í Norðuratlantshavi
og við flestu lond, sum eru við í millumlanda felagsskapum so
sum NAFO í útnyrðingspartinum av Atlantshavi og NEAFC í landnyrðingspartinum.
Treytirnar fyri fiskiskapi hjá føroyskum skipum í
altjóða sjóøki eru nógv knýttar at millumlandaavtalum og strandalandaavtalum
um fiskiskap.
Undan semjuni um havrættindasáttmálan frá 1982, sum kom
endaliga í gildi í 1994, vórðu felagsskapirnir NAFO, (Northwest
Atlantic Fisheries Organisation), og NEAFC, (Northeast Atlantic
Fisheries Commission), settir á stovn at taka sær av fiskiskapi í altjóða
sjógvi í ávikavist útnyrðings- og landnyrðingspartinum av
Norðuratlantshavi. Hóast Danmark er limur í báðum felagsskapunum
vegna Føroyar og Grønland, mynda tær føroysku og grønlendsku
sendinevndir í felag ta donsku sendinevndina á øllum
fundum; danska uttanríkisráðið hevur tó vanliga eitt umboð við á
týðandi fundum.
Síðani fyrst í nítiárunum hevur á altjóða stigi verið arbeitt nógv
fram ímóti greiðari viðurskiftum at gagnnýta fiskastovnar, sum ferðast
millum altjóða sjógv og sjóøki undir yvirvaldsræði strandalanda. Serliga
hava strandalond havt trupulleikar av hesum. Sum ein sproti
burtur úr ST-stevnuni í Rio de Janeiro í 1992, varð í 1995 semja
gjørd millum 112 limalond í ST um ein sáttmála um fiskastovnar,
sum ferðast um fiskimark og altjóða sjógv. Hóast semjan ikki formliga
hevur fingið altjóða, havrættarligt gildi enn, verður víða um í heimi
arbeitt grundað á hesa semju, bæði í einstøkum londum og í altjóða