hvítabók • fylgibind 2 fyrisiting - Løgmansskrivstovan

Undirvísingar- og mentamálastýrið · 243
ild hevur ongantíð verið nýtt, men landsstýrið/Løgtingið setur í staðin
hvørt ár eina ávísa upphædd á fíggjarlógina til Føroya Kirkjugrunn.
Men í lógini stendur einki um hetta. Seinastu árini hevur játtanin til
kirkjugrunnin verið 3. mill.kr. Peningurin í kirkjugrunninum verður
nýttur til viðlíkahald av kirkjum uttan og at byggja nýggjar kirkjur
fyri. Orsakað av kreppuni fyrst í 1990-árunum varð hetta broytt, so
styrkur ikki longur verður latin til nýbygging av kirkjum. Játtanin til
kirkjugrunnin varð tá minkað munandi, og tí gjørdi Kirkjustjórnin av
at leggja størsta dentin á viðlíkahald.
Í roynd og veru heimilar 1924 lógin bara at nýta pening til vanligan
rakstur og viðlíkahald av kirkjunum, sb. § 3 í lógini, og galdandi reglur
um at seta størv í fólkakirkjuni í Føroyum snúgva seg bara um at seta
prestar. Kortini hava einstøk kirkjuráð sett skrivstovufólk fyri at lætta
um hjá prestinum, og summi gjalda „ løn“ til urguleikara o.o. Kirkjuráðini
skulu sambært 1924 lógini senda inn fíggjarætlan til Kirkjustjórnina
til góðkenningar. Lógin ásetur, at fíggjarætlan kirkjunnar í
seinasta lagi 30. september skal sendast Kirkjustjórnini, sum staðfestir
fíggjarætlanina. Kirkjurnar senda roknskapir sínar til Kirkjustjórnina,
sum tekur støðu til teirra.
Avgreiðsluskrivstovan hjá Kirkjustjórnini var hjá Ríkisumboðnum,
til hon í apríl mánaði í 1992 varð flutt til biskupsskrivstovuna í J.
Paturssonargøtu í Havn.
Kirkjur og kirkjugarðar
Sambært 1924 lógini skulu kirkjuráðini á hvørjum ári í mai mánaði
nágreiniliga sýna kirkjubygningarnar og alt, sum har til hoyrir, og síðani
skrivliga boða Kirkjustjórnini frá, í hvørjum standi bygningarnir
eru og hvat, ið vantar. Lógin ásetur eisini, at triðja hvørt ár skal prósturin
saman við 2 byggiserkønum vera við til sýningina. Tað, sum gerast
skal við bygningin, verður av próstinum skrivað í sýningarbókina
fyri próstadømið, og úrskrift verður send Kirkjumálaráðnum, Løgtinginum
og Kirkjustjórnini. Afturat teimum 60 kirkjunum, sum
próstur skal sýna, skulu eisini teir 18 prestagarðarnir sýnast triðja
hvørt ár, og kirkjubøkurnar kring landið annað hvørt ár.
Kirkjugarðarnir standa saman við kirkjunum á lista B í heimastýrislógini.
Tað einasta, sum í 1924 lógini stendur um kirkjugarðar (§
14), er, at hvør einstøk sókn skal syrgja fyri røkt og gerð av nýggjum
kirkjugarði. Hetta skal gerast í samráði við Kirkjustjórnina, sum hevur
eftirlit við kirkjugørðunum. Eru partarnir ósamdir, tekur Løgtingið
avgerð í málinum. Kirkjugarðarnir eru ikki yvirtiknir av heimastýrinum,
hóast kommunurnar røkja teir og gera nýggjar kirkjugarðar.
Kirkjugarðarnir liggja framvegis undir Kirkjustjórnini og danskari lógsøgn
(jurisdiktion).