hvítabók • fylgibind 2 fyrisiting - Løgmansskrivstovan

150 · Hvítabók – Fylgibind 2
Niðurstøða
stýrinum. Føroyska heimastýrið er ikki umboðað í nevndini, men
kann vera við sum eygleiðari, og er eisini við í undirnevndum undir
Skipatilsýnisráðnum.
Vinnumálaráðharrin hevur eisini heimilað Sjóvinnustýrinum at
kunna heimila klassafeløgum at gera summar uppgávur fyri seg, t.d.
tøkniligar kanningar fyri at kunna sýna eitt skip endaliga. Klassafeløgini
kunnu eisini, vegna Sjóvinnustýrið, skriva út altjóða loyvisbrøv,
sum vátta teirra góðkenning.
Fígging: Økið er beinleiðis fíggjað úr Danmark. Hetta merkir, danskir
myndugleikar fíggja allar rakstrarútreiðslur, sum standast av lógarsmíði,
herímillum altjóða samarbeiði á sjóvinnuøkinum og útreiðslur
til skipasýn o.a.
Ein arbeiðsbólkur hevur í 1988 viðgjørt spurningin um at
yvirtaka skipaeftirlitið. Bólkurin metti, at yvirtøkan fór at kosta um
leið 9 mió. kr. Upp í hetta tal er ikki roknað, at vinnan skal gjalda
fyri skipasýn.
Mett verður tó, at fyritreytirnar fyri hesi kostnaðarmeting eru broyttar
frá 1988. Í álitinum frá 1988 er roknað við lutfalsliga nógvum
starvsfólki. Somuleiðis eru færri nýbygningar nú, og skipini yvir 20
tons eru farin úr 316 niður í 223.
Men arbeiðið í altjóða nevndum hevur tey seinastu árini sett nógv
størri krøv til myndugleikarnar. Talan er m.a. um fráboðanarskyldu
til IMO, Port State Control, umhvørvismál o.a.
Mett verður, at skal skipaeftirlitið verða yvirtikið við teimum skyldum
og ábyrgdum, tað hevur við sær, og við tí skipatali, sum nú er, fer
hetta at kosta í mesta lagi tað sama, sum nevnt varð í álitinum frá
1988, um leið 9 mió. kr. Tó kunnu útreiðslurnar helst verða nakað
lægri, um brúkaragjøld verða nýtt, og onkrar uppgávur verða lagdar
út til privatu vinnuna í staðin fyri at seta starvsfólk.
Ein nýggjur arbeiðsbólkur er settur í ár til at fyrireika yvirtøku av
skipaeftirlitinum. Bólkurin kemur m.a. at viðgera gjølligari, hvørjar
fíggjarligar avleiðingar hetta fer at hava.
Sjóvinnuøkið verður í høvuðsdráttum umsitið av trimum myndugleikum,
tveimum føroyskum og einum donskum. Sjóvinnufyrisitingin
í Fiskimálastýrinum umsitur manningar-, sjómans- og mynstringarlógina,
og Undirvísingar- og mentamálastýrið umsitur útbúgvingarmál
í sjóvinnu, herímillum sjómansskúlarnar og Maskinmeistaraskúlan.
Danski myndugleikin er danska sjóvinnustýrið, sum umsitur ríkislógir