hvítabók • fylgibind 2 fyrisiting - Løgmansskrivstovan

64 · Hvítabók – Fylgibind 2
gongdini á økinum bæði innan- og uttanlands og vera búgvin til at
gera neyðugar lógarbroytingar á økinum.
Gongdin í alheimssamstarvinum ger eisini, at samstarvað verður
alsamt meiri. Hetta ger, at tað, meir enn nakrantíð áður, er ein skylda
hjá londum at gera lóggávu eftir sama leisti, og er hetta eisini ofta
orsøk til, at ríkismyndugleikarnir gera ríkislógir ella gera broytingar í
teimum.
Eitt dømi um sovorðið samstarv, sum longu sæst aftur í føroyskari
lóggávu, er føroyska mvg skipanin, sum er ein beinleiðis fylgja av
handilsavtaluni við ES.
Eitt annað dømi, ið tosað verður um í løtuni, er, at lond fara at
samstarva um at gera lóggávu um handil á internetinum. Um so varð,
at lóggávan á hesum øki varð yvirtikin sambært galdandi heimastýrisskipan,
hevði verðið neyðugt at sett av løgfrøðiliga arbeiðsmegi til
at vera við í tílíkum samstarvi.
Annað enn at hava verið við í norðurlendskum lógarsamstarvi, hava
Føroyar lítlar og ongar royndir á hesum øki.
Um so er, at Føroyar eisini skulu umsita uttanlandsmál burturav,
so krevur hetta harafturat, at løgdeildin verður styrkt á altjóðarættarliga
økinum.
Tað er torført at meta um fíggjarliga tørvin, tí tað veldst um,
hvussu umfatandi millumtjóðasamstarvið verður, men ilt er at
ímynda sær eitt løgfrøðiligt umhvørvi á hesum øki við færri enn fýra
ársverkum.
Ein orsøk til, at ríkislóggávan, ið er umrødd her, ikki er yvirtikin
sambært galdandi heimastýrislóg, kann vera, at nærum einki av
økinum hoyrir til heimastýrislógina, og yvirtekst tí ikki eftir hesi
skipan.
Í sambandi við at nevnda ríkislóggáva kemur undir føroyskt málsræði,
eigur at verða umhugsað, hvussu ein skipan við frálæru í føroyskari
løgfrøði á hægri stigi kann verða skipað.
Sum er, ber ikki til at fáa frálæru í føroyskari løgfrøði, sjálvt um
staðfestast kann, at føroysk lóggáva í alsamt fleiri førum er øðrvísi enn
t.d. donsk lóggáva.
Tá ið rættarskipanin kemur undir føroyskt málsræði, verður hesin
spurningur upp aftur meiri viðkomandi, og eigur nevndin, ið skal gera
uppskot til føroyska rættarskipan, tí at viðgera henda spurning sum
ein part av sínum arbeiðssetningi.
2.2. Føroyskar rættarreglur, sum vísa til danskar myndugleikar
Í fleiri føroyskum lógum eru settar inn rættarreglur, ið vísa til danskar
myndugleikar. Hetta kann hava fleiri orsøkir. Ein orsøk kann vera, at