hvítabók • fylgibind 2 fyrisiting - Løgmansskrivstovan

70 · Hvítabók – Fylgibind 2
Kapittul 3
3. Mál, sum Danmark umsitur, og
málsetingar fyri sjálvstøðuga umsiting
3.1 Uttanríkismál
Fyrisiting av uttanríkismálum
Av tí at málsøkið uttanríkismál sambært heimastýrislógini er felagsmál,
er lóggávan á økinum mest donsk. Tó er í ávísum førum serføroysk
lóggáva sett í gildi í sermálum í sambandi við gildisseting av
millumríkjasáttmálum. Annars verður víst til Lovregister for Færøerne
1998.
Skipan av uttanríkistænastu Føroya
Samsvarandi fullveldisætlanum Landsstýrisins kemur málsøkið uttanríkismál
undir føroyskt málsræði, og verða tey mál, ið áður formliga
lógu undir danska uttanríkismálaráðnum, sambært bygnaðinum í
landsfyrisitingini løgd undir uttanríkisdeildina á Løgmansskrivstovuni
saman við umboðsstovunum uttanlands.
Føroyskt málsræði á økinum fer at seta ávís fyrisitingarlig krøv.
Fyrst verða fyritreytir nevndar, síðani verður ein lýsing gjørd, grundað
á fyritreytirnar.
Fyritreytir fyri at skipa føroyska uttanríkistænastu
✓ Føroya landsstýri fær ábyrgd av at skipa eina uttanríkistænastu, ið
tryggjar týdningarmikil føroysk áhugamál í samskifti Føroya við
umheimin.
✓ Avgerandi fyri, hvussu ein føroysk uttanríkistænasta verður skipað,
er, hvussu umfevnandi uttanríkissamstarvi føroyingar hava tørv á,
bæði við onnur lond og við millumríkjafelagsskapir. Lond, sum eru
javnstór við Føroyar, hava vanliga sendistovu og umboðsstovu í
grannalondum sínum, fyrrverandi miðveldi (í hesum føri Danmark),
næsta stórveldi, høvuðsmarknaði og á ST-høvuðsborgini í New York.
✓ Í flestu londum er tað nøkulunda helvt um helvt, um starvsfólk í
uttanríkistænastu arbeiða heima ella burturi. Tó er vanligt hjá londum,
sum eru á stødd við Føroyar, at tann størra helvtin starvast uttan-