hvítabók • fylgibind 2 fyrisiting - Løgmansskrivstovan

188 · Hvítabók – Fylgibind 2
Lóggáva: Loftferðslulógin er donsk, tó við ymsum broytingum, sum
heimastýrið hevur ásett. Nógvar ásetingar í lógini galda bert eftir samráðingar
við Landsstýrið. Í onkrum føri verður ásett, at heimastýrið skal
verða kunnað ella hoyrt. Allastaðni í lógini verður tilskilað, at har tað
stendur „dansk bruger,“ „dansk ledelse,“ „dansk bestyrelse“ o.s.fr., ber
til at lesa tekstin soleiðis, at „ved dansk forstås tillige færøsk.”
Flogferðsla verður regulerað sambært teimum treytum, sum loftferðslustovnur
Sameindu tjóða, ICAO, setir, eins og eftir altjóða sáttmálum,
ES-reglum og loftferðslulógini, sum aftur lýkur tær treytir,
sum altjóða og fleirtjóða felagsskapir seta flogferðsluni. Tí verður
mælt til at fylgja donsku rættarreglunum á økinum við teimum
broytingum og tillagingum, sum hóska til føroysk viðurskifti. Avtala
verður gjørd við Ferðslumálaráðið um mannagongd í sambandi við
lóggávuarbeiði. Hetta fer ikki at kosta meira enn verandi skipan.
Sum fullveldi eiga Føroyar at taka undir við Chicagosáttmálanum og
gerast sjálvstøðugur limur í ICAO. Við hesum átaka føroyingar sær somu
fólkarættarligu ábyrgd, sum nú liggur á Danmark. Í fyrsta umfari kunnu
føroyingar lata íslendingum flogtrygdartænastuna at umsita. Íslendingar
umsita sum er føroyska loftrúmið, Danmarkar vegna. Í framtíðini fáa
føroyingar møguleika fyri at veita flogtrygdartænastuna, um vit eru
sinnaðir til tess, og treytað av, at ICAO tekur undir við hesum.
Fíggjarviðurskifti: Danmark rindar ICAO 1,3 mió. kr. í árligum limagjaldi.
Statens Luftfartsvæsen, (SLV), upplýsir, at gjaldið er ásett eftir
bruttotjóðarúrtøkuni hjá limalondunum, og merkir tað, at Føroyar
bert skulu gjalda um leið 11 tús. kr. um árið í limagjaldi. Til at røkja
henda limaskap og fyrisitingarútreiðslur í hesum sambandi, krevjast
leystliga mett 200 tús. kr. árliga.
Flogvøllurin í Vágum, sum SLV rekur, (flogvallarøkið), rindar um leið
2,9 mió. kr. um árið yvir raksturin fyri allar tænastur, sum Loftferðslueftirlitið
og Flogtrygdartænastan veita á føroyskum øki. Flogfeløgini
rinda sjálvi fyri at útbúgva og góðkenna starvsfólk.
Danskir myndugleikar, (Ferðslumálaráðið og SLV), hava víst á møguleikan
fyri, at føroyingar yvirtaka raksturin av flogvøllinum í Vágum.
Gongdin hevur verið soleiðis seinru árini, at SLV hevur avhendað
flogvøllir sínar og rekur nú bert tveir flogvøllir. 25 fólk starvast hjá
SLV á flogvøllinum, umframt 7 starvsfólk, sum eru keypt í starv frá
Flogtrygdartænastuni. Bókførda virðið av føstu ognini hjá SLV á flogvøllinum
við árslok 1997 var 23 mió. kr.