hvítabók • fylgibind 2 fyrisiting - Løgmansskrivstovan

Flogferðslan
Samandráttur og niðurstøður · 23
Flogferðsla er størsta felagsmál undir Vinnumálastýrinum, og heimastýrið
hevur onga formliga ábyrgd á økinum.
Kortini verður ikki talan um nakað stórt lóggávuarbeiði, tá ábyrgdin
skal verða flutt til eitt føroyskt fullveldi, tí hóast loftferðslulógin
er donsk, er galdandi lóg lagað til føroysk viðurskifti. Harumframt
verður flogferðsla skipað eftir teimum treytum, sum settar verða av
ICAO, (loftferðslustovnur undir ST), altjóða sáttmálum og ES-reglum.
Lógirnar verða ofta orðaðar eftir boðum frá altjóða ella fleirtjóða
felagsskapum.
Galdandi lógir kunnu tí í flestu førum verða lýstar sum føroyskar
lógir.
Vinnumálastýrið mælir kortini til, at avtala verður gjørd við Ferðslumálaráðið
um vegleiðing í sambandi við lóggávuarbeiðið á økinum.
Umframt tað, verður neyðugt at taka hesi stig:
Sum fullveldi eiga Føroyar at taka undir við ávísum altjóða sáttmálum
á flogferðsluøkinum og gerast limir í ICAO. Við hesum átaka
Føroyar sær ta rættarligu ábyrgd, sum nú liggur í Danmark.
Tá ið talan er um skráseting av føroyskum flogførum og tyrlum,
mælir Vinnumálastýrið til, at Skráseting Føroya tekur sær av tí. Sum
er, eru flogfarið hjá Atlantsflogi og tyrlan hjá landsstýrinum skrásett í
National Register hjá Statens Luftfartsvæsen, (SLV). Vinnumálastýrið
mælir til, at tey í staðin verða skrásett í Skráseting Føroya og fáa føroyskt
tjóðarfrámerki.
Neyðugt verður at gera samstarvsavtalu við Skaðanevndina, (Havarikommissionen
for civil luftfart), soleiðis at hon eisini kannar tilburðir,
um eitt føroyskt skrásett flogfar skuldi verið fyri óhappi. Verður
goldið eftir íbúgvatali í londunum, kostar tænastan 41.000 kr. um
árið.
Í løtuni rekur SLV flogvøllin í Vágum, og skal raksturin á føroyskar
hendur, fer tað at hava útreiðslur við sær. Fíggjarætlanin hjá SLV í
1998 vísir 8,9 mió. kr. í halli, sum minkar til 5,9 mió. kr. í ár 2002.
Hetta er eftir rentur og avskrivingar, og íløgur upp á 2,2 mió. kr. eru
viðtaldar. Roknað verður við einum lítlum vøkstri í ferðafólkatalinum.
Vinnumálastýrið vísir á, at SLV farnu árini hevur avhendað raksturin
av teimum flestu av flogvøllunum, sum stovnurin hevur havt
ábyrgdina av. Í samsvari við hesa gongd hava danskir myndugleikar
víst á møguleikan fyri, at føroyingar yvirtaka raksturin av flogvøllinum
í Vágum. Ávísar kanningar hava verið gjørdar í hesum sambandi.
Hvat viðvíkir rakstrinum av flogtrygdartænastuni, mælir Vinnu-