hvítabók • fylgibind 2 fyrisiting - Løgmansskrivstovan

20 · Hvítabók – Fylgibind 2
tað snýr seg um lóggávuarbeiði í altjóða nevndum og ráðum, verður
hetta gjørt í samstarvi við danskar myndugleikar. Talan er um eitt sera
tekniskt og fakliga krevjandi øki, og verður tí neyðugt við samstarvi
við danskar myndugleikar í eitt áramál framyvir, inntil føroysku
myndugleikarnir hava fullgóðan førleika á økinum.
Tær mest týðandi ríkislógirnar á økjunum eru helst sjólógin og lógin
um skipatrygd.
Sjólógin snýr seg um framferð á sjónum á nógvum økjum. Hon
ásetir, hvørja skyldu skiparin hevur at tryggja manningar og ognir, hon
ásetir reglur um flutning av fólki og góðsi, um framferð í sambandi
við samanstoyt, bjarging á sjónum, oljudálking o.tíl.
Lítil fyrisiting er av lógini. Hon verður mest brúkt, tá ymsar hendingar
á sjónum koma fyri rættin, og staðfestast skal, um nakað ólógligt
er farið fram, ella um nøkur privatrættarlig ábyrgd kann staðfestast.
Stýrið metir tí ikki, at fullveldi á hesum øki fer at fáa aðrar fíggjarligar
skyldur enn tær, ið knýttar eru at lógarsmíði í Føroyum og í
norðurlendskum og altjóða høpi.
Hvat Skipaeftirlitinum viðvíkir, rinda danskir myndugleikar allar
rakstrarútreiðslur, sum er.
Ein arbeiðsbólkur viðgjørdi í 1988 spurningin um at yvirtaka skipaeftirlitið,
og hann metti, at yvirtøkan fór at kosta um leið 9 mió. kr.
Tó skal verða gjørt vart við, at tá var ikki talan um at áseta brúkaragjald
ella at leggja ávísar uppgávur út til privata vinnu. Tí metir
stýrið, at tær almennu útreiðslurnar av einum føroyskum skipaeftirliti
kunnu verða minni enn 9 mió. kr.
Tað eigur at verða nevnt í sambandi við skipaeftirlitið, at lógarøkið
er ógvuliga tekniskt og sera umfatandi. Neyðugt verður eisini at vera
við í altjóða nevndum og lógarsmíði. Tí metir Fiskimálastýrið, at
neyðugt verður við einum ávísum samstarvi við Danmark á hesum
øki í eina tíð, eftir at økið er vorðið føroyskt.
Ein arbeiðsbólkur varð settur fyrr í ár at fyrireika yvirtøku av skipaeftirlitinum
og at kanna tær fíggjarligu avleiðingarnar. Álitið hjá hesum
bólki fer at vísa, hvørji krøv verða á hesum øki, og hvat eitt føroyskt
skipaeftirlit fer at kosta. Tá verður eisini greitt, hvørji føroysku
ynskini skulu verða í hesum sambandi, tá samráðast skal við danir um
skiftistíðina.
Mælt verður til, at skipaeftirlit, sigling og onnur lóggáva um sjóvinnu
verða skipað undir Fiskimálastýrinum í fullveldinum.
Eitt annað danskt mál er neyð- og trygdarskipanin á radioøkinum.
Tele Danmark A/S hevur ábyrgdina av hesum, og Føroya Tele rekur
støðina Tórshavn radio vegna Tele Danmark. Fiskimálastýrið mælir til,
at økið verður skipað undir Føroya Tele.