hvítabók • fylgibind 2 fyrisiting - Løgmansskrivstovan

Kapittul 5
Undirvísingar- og mentamálastýrið · 241
Mál, sum Danmark umsitur og sum natúrliga
eiga at vera undir Undirvísingar- og mentamálastýrinum
5.1. Kirkjan
16 – Hvítabók – Fylgibind 2
Kirkjan man vera einasta mál, sum Danmark umsitur nú, sum natúrliga
eigur at vera undir Undirvísingar- og mentamálastýrinum.
Sum kunnugt eru ríkislógartilmæli um nýggjar kirkjulógir samtykt
í Løgtinginum, og verða hesar lógir settar í gildi fyri Føroyar, tá ið
reglur og kunngerðir fyri lógirnar eru gjørdar. Nú hevur landsstýrismaðurin
í kirkjumálum sett ein arbeiðsbólk at fyrireika yvirtøku av
kirkjuni og at gera uppskot um føroyska kirkjulóggávu. Tískil kann
væntast, at tær nýggju kirkjulógirnar verða avloystar av nýggjari føroyskari
kirkjulóggávu, tá ið fólkakirkjan verður yvirtikin. Í hesum áliti
er valt at gera eina almenna lýsing av verandi rættarreglum, fyrisiting
og fígging av fólkakirkjuni.
Verandi rættarstøða
Bygnaðurin í føroysku kirkjuni er ein tvítáttað skipan.
Annar tátturin er kirkjuráðini – Kirkjustjórnin – Løgtingið/Landsstýrið.
Hesin táttur umsitur føroyska peningin, veitir stuðul til viðlíkahald
av kirkjum, ásetir, hvussu stóra upphædd kirkjuráðini kunnu
nýta sum tøkupening (rådighedsbeløb) o.a. og hevur umsjón við
kirkjum og kirkjugørðum.
Bispur hevur einki við henda part av bygnaðinum at gera, hóast
hann av røttum verður mettur at vera ovasti leiðari kirkjunnar. Í lóg
nr. 109 frá 29. mars 1924 fyri Føroyar um stjórn kirkjunnar o.a. sum
er broytt við lóg nr. 192 frá 11. mai 1935, eru ásettar nærri reglur
um, hvussu Kirkjustjórnin útinnir virksemi sítt.
Hin tátturin er kirkjuráðini – Stiftstjórnin – Kirkjumálaráðið. Hesin
táttur hevur um hendi prestaumsitingina, eitt nú løn, tænastumannahús
og virksemið hjá kirkjuráðunum. Nærri reglur fyri, hvussu Stifts-