hvítabók • fylgibind 2 fyrisiting - Løgmansskrivstovan

140 · Hvítabók – Fylgibind 2
Kapittul 2
2.1. Danskar rættarreglur, sum eru settar í
gildi fyri Føroyar
Fiskivinnumál
Fiskiskapur
Fiskimark og eftirlit
– L.nr. 210 af 19.05.1971 om internationale reguleringsforanstaltninger
vedrørende fiskeri.
Lóggáva: Talan er um ríkislóg, sum gevur myndugleikunum heimild
at gera altjóða sáttmálar og avtalur um fiskiveiðu innan og uttan fyri
danskt sjóøki. Hetta fevnir eisini um føroyskt sjóøki.
Lógin gevur heimild til at áseta kunngerðir í sambandi við gjørdar
sáttmálar og avtalur. Áðrenn kunngerðirnar verða settar í gildi fyri
Føroyar, skal føroyska heimastýrið, eftir samráðingar, hava góðkent
kunngerðirnar.
Talan er um lóggávu, sum m.a. var knýtt at tí fyrra NEAFC-sáttmálanum.
Við tað Føroyar høvdu ávísir trupulleikar sambært heimastýrislógini
at áseta reguleringar um fiskiskap uttan fyri 12 fjórðinga
fiskimarkið, varð neyðugt við serligari ríkislóggávu. Hvat ið viðvíkir
umsiting av føroysku fiskiveiðuni, hevur henda lóggáva ikki havt
nakran leiklut tey seinastu nógvu árini. Mælt verður tí til, at lógin
formliga verður sett úr gildi.
Fyrisiting: Sambært § 1, stk. 1, er tað danska stjórnin, sum kann seta
altjóða sáttmálar í gildi, bæði innan fyri og uttan fyri danska fiskimarkið.
– L.nr. 597 af 17.12.1976 om Danmarks Riges Fiskeriterritorium.
Lóggáva: Talan er um ríkislóg, sum gevur danska forsætismálaráðharranum
heimild við kongligari fyriskipan at seta avmarkingar fyri
føroyskt sjóøki.