hvítabók • fylgibind 2 fyrisiting - Løgmansskrivstovan

Almanna- og heilsumálastýrið · 309
3. Fíggjarlig ábyrgd
Málsøkið er felagsmál, tað merkir, at fíggjarliga ábyrgdin av málsøkinum
liggur í Danmark.
Um upplýsingar um fíggjarligar avleiðingar annars, sí inngangin til
kapitlið. Tað, sum har stendur, er galdandi fyri allar heilsuútbúgvingar.
Fótrøktarar (Fótterapeutar)
A. nr. 100 af 20.02.1987 om ikrafttræden på Færøerne af lov om
fodterapeuter.
1. Fyrisitingarligir myndugleikar og uppgávur
Myndugleikarnir í fyriskipanini eru Heilsumálaráðið, Undirvísingarmálaráðið,
Sundhedsstyrelsen, danska Undirvísingardirektoratið og
fútin.
Uppgávurnar hjá Heilsumálaráðnum sambært fyriskipanini er at
góðkenna fótrøktarar, eisini teir, sum hava tikið líknandi útbúgving
sum ta donsku í øðrum londum. Tá ið ein skal vera góðkendur, verður
mett, um viðkomandi er egnaður at vera fótrøktari. Heilsumálaráðið
sær til, at yvirlit er yvir givnar góðkenningar, og ráðið kann eisini taka
góðkenning frá fólki og geva hana aftur av nýggjum.
Uppgávan hjá Undirvísingarmálaráðnum er at góðkenna fótrøktaraskúlar
og at áseta neyvari reglur um útbúgvingina og um kærumøguleikar,
tá ið Undirvísingarmálaráðið sambært fyriskipanini hevur
latið Undirvísingarstýrinum sína ábyrgd.
Uppgávan hjá Sundhedsstyrelsen er at hava eftirlit við fótrøktarunum
sambært „lov om sundhedsvæsenets centralstyrelse,“ (sí omanfyri).
Sundhedsstyrelsen almannakunnger, tá ið fótrøktarar missa góðkenningina,
ger vegleiðingar um arbeiðsøkið hjá fótrøktarunum og
ásetir neyvari reglur um, hvussu fótklinikkir verða innrættaðar.
Uppgávan hjá fútanum er, at um fótrøktari gerst sekur í grovari ella
endurtakandi misrøkt í starvi sínum, skal fútin átala hetta, og verður
fótrøktarin tá revsaður við bót ella hefti.
2. Lóggáva
Lógin ásetir reglur um, hvat krevst av fótrøktarum og virksemi teirra
í Føroyum.
Økið er felagsmál, og lógin er tí sett í gildi í Føroyum við kongligari
fyriskipan, men er ikki dagførd síðani 1987, av tí at føroyska umsitingin
hevur ikki havt neyðuga arbeiðsorku til tess.
Um lóggávuna annars og samstarvsavtalu við donsku stjórnina, sí
inngangin til kapitlið. Tað, sum har stendur, er galdandi fyri allar
heilsuútbúgvingar.