hvítabók • fylgibind 2 fyrisiting - Løgmansskrivstovan

30 · Hvítabók – Fylgibind 2
góðkennir útbúgvingarnar, um føroyskt sjófólk skal kunna sigla við
útlendskum skipum og við føroyskum skipum í onnur lond.
Antin má hetta samstarv halda fram sum nú, ella mugu føroyskir
myndugleikar sjálvir fáa IMO at góðkenna okkara útbúgvingar. Hetta
krevur, at Føroyar fáa limaskap í ST og IMO, og eina umsiting at
syrgja fyri fyrireikingararbeiðinum til góðkenningina. Í donsku umsitingini
er hetta málsøkið í Søfartsstyrelsen, og tí eigur tað kanska at
verða lagt til Fiskimálastýrið í føroysku umsitingini.
Um lærlingaútbúgvingarnar er eisini nógv og týdningarmikið samstarv.
Av teimum 70 lærlingaútbúgvingunum í Føroyum eru 44, har
lærlingar verða sendir til Danmarkar í lærutíðini. Mett verður, at uml.
70 lærlingar fara til Danmarkar í miðal 10 vikur hvørt ár.
Avtalur eru gjørdar við so at siga allar yrkisnevndir í Danmark um,
at føroysk sveinabrøv verða góðtikin í Danmark ájavnt við donsk
sveinabrøv. Treytirnar eru, at læruráðið veitir trygd fyri, at føroysku
útbúgvingarnar eru fult so góðar sum tilsvarandi útbúgvingar í Danmark
– bæði verkliga læran á læruplássinum og ástøðiliga og verkliga
innihaldið í skúlanum.
Landsskjalasavnið hevur tætt samstarv við Statens Arkiver. Í sambandi
við fullveldisætlanina verður neyðugt at endurskoða avtaluna
millum hesar stovnar, og prinsipiellar avgerðir mugu takast um, hvar
savnindi statsins í Føroyum og føroysk savnindi í Danmark skulu
goymast í framtíðini.
Jarðfrøðisavnið hevur samstarv við Danmarks og Grønlands Geologiske
Undersøgelser, GEUS. Hetta samstarv er av stórum týdningi
og á fleiri stigum.
Sum skilst, er talan um nógv samstarv, og tað hevur í fleiri førum
avgerandi týdning – bæði fakliga og fíggjarliga.
Undirvísingar- og mentamálastýrið mælir tí til at gera eina avtalu,
sum tryggjar, at verandi samstarv millum føroyskar og danskar stovnar
og myndugleikar kann halda áfram. Tað einfaldasta er, at tað í avtaluni
um skiftistíðina verður staðfest, at føroyskir stovnar hava rætt
til hetta samstarv, og at stovnarnir sjálvir – eins og nú – leggja tað til
rættis.
Stýrið metir, at eitt tílíkt samstarv kann fáast í lag, men fíggjarliga
verður tað helst dýrari enn nú. Tað er sannlíkt, at donsku myndugleikarnir
fara at krevja, at vit rinda fyri onkrar av teimum tænastum,
sum vit sum er fáa fyri einki sum partur av ríkinum. Hvussu nógv
talan verður um, er ilt at siga.