hvítabók • fylgibind 2 fyrisiting - Løgmansskrivstovan

138 · Hvítabók – Fylgibind 2
Av týðandi ríkislógum kunnu verða nevndar sjólógin frá 1985, við
broytingum frá 1997, og lóg nr. 98 frá 12.03.1980 um skipatryggleika.
Viðvíkjandi sjólógini eru ikki nógvar beinleiðis fyrisitingarligar
uppgávur hjá tí almenna at røkja, og tí verður mett, at tær
flestu fíggjarligu skyldurnar eru knýttar at lógarsmíði í Føroyum og í
norðurlendskum og altjóða høpi.
Viðvíkjandi skipaeftirlitinum skal verða nevnt, at økið er beinleiðis
fíggjað úr Danmark. Ein arbeiðsbólkur viðgjørdi í 1988 spurningin
um at yvirtaka skipaeftirlitið. Bólkurin metti tá, at yvirtøkan fór at
kosta um leið 9 mió. kr. Tó skal vart verða gjørt við, at tá var ikki
talan um brúkaragjald, ella at ávísar uppgávur kunna verða latnar
privatu vinnuni. Tí verður mett, at útreiðslurnar kunnu verða lægri,
enn omanfyri nevnt. Eisini er at viðmerkja, at arbeiðsbólkur er settur
í ár at fyrireika yvirtøku av skipaeftirlitinum, herímillum eisini at
kanna fíggjarligar avleiðingar.
Í sambandi við skipaeftirlit eigur at verða nevnt, at lógarøkið er
ógvuliga tekniskt og sera umfatandi, umframt at vit mugu vera við í
altjóða nevndum og lógarsmíði. Tí verður mett, at neyðugt verður við
ávísum samstarvi við Danmark um skipaeftirlit – eisini eina tíð aftan
á, at økið er komið undir føroyskt málsræði. Hetta kann støða verða
tikin til, eftir at nevndin, sum er sett til at fyrireika yvirtøku av skipaeftirlitinum,
hevur lagt sítt álit fram seinni í ár og eftir samráðingar
við danir.
Av teimum uttanríkismálum, ið knýta seg til sjóvinnu, er tað serliga
arbeiðið í ST-havfelagsskapinum IMO, (International Maritime
Organisation), sum hevur stóran týdning fyri føroyska sjóvinnu. Í
felagsskapinum arbeiða fleiri tekniskar nevndir, sum eru mannaðar
við fólki frá teimum ymsu sjóvinnumyndugleikum saman við serfrøðingum
á ymsu økjunum. Krøvini verða ásett í altjóða sáttmálum sum
t.d. SOLAS, STCW, LL og MARPOL, sum Danmark hevur samtykt
at seta í gildi fyri Føroyar eftir tilmæli frá heimastýrinum. Í sambandi
við fullveldi eiga Føroyar at gerast sjálvstøðugt limaland í tílíkum felagsskapum
á sjóvinnuøkinum, teirra millum serliga IMO.
Av tí at Føroyar ikki eru við í ES, hava føroyingar ikki havt umboð
á teimum sjóvinnufundum, sum har hava verið. Ásetingarnar í ESfyriskipanum
um sjóvinnu ávirka tó føroyska sjóvinnu beinleiðis, tí
at krøvini verða sett at galda øll skip, sum koma í ES-havn.
Tann parturin, sum knýtir seg til skipaeftirlit, sigling og aðra lóggávu
í sjóvinnu, eigur at verða umsitin í Fiskimálastýrinum, sum
hevur sjóvinnu sum ábyrgdarøki.
Tele Danmark A/S hevur ábyrgdina av neyð- og trygdarskipanini á
radioøkinum. Føroya Tele rekur støðina Tórshavn radio vegna Tele
Danmark, og kann økið tí verða skipað undir Føroya Tele.