hvítabók • fylgibind 2 fyrisiting - Løgmansskrivstovan

88 · Hvítabók – Fylgibind 2
Av tí at langt er ímillum løgurnar á løgregluøkinum, verður mett, at
nettokostnaðurin uttan løgur vísir sannastu myndina av beinleiðis
kostnaðinum.
Annars er lutfallið: fólkatal/løgreglufólk – (45.000/99,5 4 =452), nakað
væl lægri enn í Danmark, har tað er (5.275.000/9837=536), men átøkt
íslendska lutfallinum, sum er (266.000/600=443). Hetta kann vera ein
natúrlig fylgja av, at økini eru smá, og tí krevja lutfalsliga størri
manning, enn stór og fjølbygd øki, um javngóð trygd skal verða veitt
fyri somu tænastu. Íslendsku tølini benda samstundis á, at løgregluliðið
longu hevur á leið ta stødd, sum krevst til eina sjálvstøðuga smátjóð,
sum vil verða mett sum trygg og framkomin, eisini á hesum økinum.
Tí verður ikki mett, at fullveldið fer at bera við sær annan vøkstur
í løgregluliðnum enn tann, sum krevst í sambandi við altjóða samstarv,
(sí niðanfyri).
Fjaldur kostnaður
Aftur at hesum beinleiðis útreiðslum koma so ymsar fjaldar útreiðslur,
har talan er um tænastur, sum løgreglan Føroyum fær uttan at
gjalda afturfyri, tí hon er partur av donsku løgregluni.
Talan er oftast um heilar tænastur, men á onkrum økjum tó lutvísar
• Neyðsendartænastan hjálpir í sambandi við umfatandi tiltøk.
• Ferðaliðið hjálpir í serligum førum, oftast í sambandi við umfatandi
kanningararbeiði og í sambandi við fíggjarkriminalitet.
• Kriminalteknisk deild ger allar kriminaltekniskar greiningar, og
kemur harafturat í serligum førum á staðin at gera kanningar.
• Starvsfólkadeildin hevur stóran part av starvsfólkaumsitingini her
um hendi. Í samráði við løgregluskúlan, stendur deildin somuleiðis
fyri at leggja til rættis eftirútbúgvingina hjá øllum starvsfólkabólkum.
• Løgregluskúlin veitir snøgt sagt alla útbúgving og eftirútbúgving
á økinum 5 . Løgreglufólk fáa bæði grund-, eftir- og leiðaraútbúgvingar
sína haðani, og somuleiðis verða bæði løgfrøðingar og skrivstovufólk
annars eftirútbúgvin á løgregluskúlanum. Seinastu árini
hava millum 4 og 8 føroyingar verið í grundútbúgving hvørt árið.
3 Av tí at forsætismálaráðharrin hevur sýtt fyri, at danskir myndugleikar lata aðrar upplýsingar
í sambandi við sjálvstýrisverkætlanina enn tær, sum longu eru tøkar, bar heldur
ikki til at royna at gera neyvar metingar saman við starvsfólki frá løgregluni.
4 Her er roknað við, at eykaløgreglufólk í miðal arbeiða hálva tíð.
5 Tó eru t.d. viðlíkahaldsskeið í sjálvverju, vápnakynstri og telduførleika eisini úti í økjunum.