hvítabók • fylgibind 2 fyrisiting - Løgmansskrivstovan

246 · Hvítabók – Fylgibind 2
Fleiri fyriskipanir liggja ymsastaðni, meir ella minni fjaldar, og tann
samskipanin, sum seinastu árini er farin fram í lóggávuarbeiðinum í
Danmark, er ikki gjørd í Føroyum. Hetta vísir eisini, hvørjir trupulleikar
kunnu standast av eini endurskoðan av kirkjulóggávuni, tí hon
kemur eisini inn á onnur rættarøki. Omanfyri nevnda fyriskipan um
giftu er nevniliga givin út við heimild í hjúnabandslógini og má tí
verða varðveitt, til ein nýggj hjúnabandslóg er komin. Fyriskipanin
ásetur reglur um, hvør ið kann víga hjún borgarliga og vælsigna borgarliga
giftu.
Jarðarferðarlógin er lóg nr. 100 frá 19. apríl 1907 um ymisk viðurskifti
viðvíkjandi jarðarferðum, sum er sett í gildi við fyriskipan nr. 9
frá 17. januar 1908. Lógin ásetur reglur bæði fyri kirkjuliga og borgarliga
jarðarferð – seinna er við ongun presti. Har eru eisini reglur
fyri at seta á stovn kommunalar kirkjugarðar.
Í sambandi við ritual skal verða nevnt, at Hans J. Joensen, biskupur
er vígdur eftir ritualinum í kunngerð nr. 151 frá 20. mars 1987, sum
ikki er galdandi í Føroyum. Biskupurin átti av røttum at verið vígdur
eftir ritualinum í kunngerð nr. 119 frá 8. september 1989 um góðkenning/løggilding
av nýggjum rituali fyri biskupsvígslu.
Samanumtikið kann verða sagt, at galdandi kirkjurættur í Føroyum
fyri tað mesta byggir á ymiskar, ofta sera gamlar lógir og kunngerðir/rundskriv,
sum ikki altíð samsvara so væl hvør við aðra. Oftani
eru ongar kunngerðir/rundskriv. Lógirnar eru ofta fáorðaðar og
svara ikki teimum spurningum, sum stinga seg upp í einum nútímans
samfelag. Summar lógir eru ógvuliga spjaddar og ósamanhangandi,
og í fleiri førum sita vit við lógum, sum í Danmark vórðu býttar
sundur fyri nógvum árum síðani og skipaðar av nýggjum. Støðan
hevur leingi verið tann, at nógvar av teimum gomlu lógunum als
ikki verða fylgdar. Kanska kann her verða víst til desvetudo, tvs. at
ein lóg ella rættarregla dettur burtur, hevur hon ikki verið nýtt í
longri tíð. Í staðin hevur ein nýggj, rangvørg siðvenja tikið seg upp.
Hetta styrkir ikki rættarkensluna í samfelagnum og kann hava við
sær, at ein óskrivaður siðvenjurættur, sum kann verða torførur at
umsita, fær fótin fastan.
Kirkjunevndin
Landsstýrismaðurin við undirvísingar- og mentamálum, ið eisini situr
fyri kirkjumálum, hevur sett nevnd at gera uppskot til yvirtøku av
fólkakirkjuni. Arbeiðssetningurin hjá fólkakirkjunevndini er m.a.:
• At skapa neyðuga grundarlagið fyri samráðingum millum landsstýrið
og kirkjumálaráðið um, hvussu yvirtøkan av fólkakirkjuni
kann fara fram.